054 柏德琳修士-肺癆病人 ê 天使

tailoclassatl
Jul 3
6 min read

文稿編寫：蕭如娟校對：杜荷洲李以如陳亞彤

眼睛讀台語有點吃力? 用耳朵聽台語柏德琳修士的故事

出世tī意大利農家母親將伊奉獻hōo上帝

柏德琳(Giovanni Petrin)是1934年出生 tī 意大利威尼斯附近 ê 農家。厝--裡有8个兄弟姊妹。 12歲 ê 時致著重病強強 beh 死--去！老母向天主祈禱：「主啊！若 beh 叫伊來服侍你，你 tō kā 伊留--落-來！若無，請你 kā 伊 tshuā--去！」。 Tsiânn 奇妙 ê 是無偌久病 suah 好--去！柏德琳 tō 加入去有400年歷史 ê 天主教靈醫會；決定 beh 成做一个一生替病人醫治身心靈 ê 事工，來實踐老母對天主 ê 還願。伊入去米蘭 ê 護士學校讀冊，畢業了後入去病院服務，tī 5年 ê 服務期間看盡人生冷暖 kah 生、離、死、別。

咬喙齒根適應台灣 ê 生活

1957年柏德琳(23歲) tī 老母 ê 鼓勵之下，hîn 船3个月才來到基隆，hőng 安排去宜蘭羅東 ê 聖母醫院服務。 Hit 時羅東 ê 衛生環境 tsiânn bái，街市比想像--ê kok khah 落伍，鳥鼠比貓仔 khah 大隻；辛苦所學 ê 華語 tī 羅東 suah 無路用！原來大家講--ê lóng 是台語。柏德琳逐工 bih tī 棉襀被--裡 háu，想 beh 倒轉去意大利；m̄-koh想著愛 koh 坐3个月 ê 船才會轉到厝，只好忍耐留--落-來。

hām天下第一快刀合作無間

柏德琳是受過正規訓練 ê 護士 hőng 派去開刀房，幫贊有「天下第一快刀」稱號 ê Oki 醫師 hia 做助理。 Oki 醫師 ê 快刀手術 tō sī beh 降低病毒 ê 感染，所以伊要求手術房愛有上 kuân ê 效率；為著 beh 搶時間，Oki 醫師六親不認，制定一套嚴格 ê 工作標準，若是 tuè bē tio̍h陣--ê，工具提m̄-tio̍h--ê lóng 會 hōo 伊罵 kah 臭頭；kan-na 跤手 liú-lia̍h、頭殼聰明 ê 柏德琳上了解 Oki 醫師 ê 需要；Oki 醫師一伸手，手術的家私就分秒不差--ê 交 tī Oki 醫師 ê 手--裡。Oki 醫師足欣賞柏修士 ê 配合，講 in 兩个是一對手--ê。Tō 按呢 tī 聖母醫院手術房一做 tō 做12年。 In 兩个 lóng- tsóng 開過2萬1千外台 ê 刀而且是零失誤--ê。

出任院長轉換去「丸山療養院」照顧肺癆患者

1960年代宜蘭地區肺癆病大流行！肺癆病主要 ê 原因是公共衛生無好，醫療水準低路；著肺癆 ê 人就(tō)像hőng判死刑 kāng款。連親人都(to)閃 kah 離離離。羅東聖母病院就 tī 冬山鄉設立「丸山療養院」專門收留人看人驚 ê 肺癆病人，由柏德琳修士出任院長。

肺癆病人會 hōo 親人 tàn tī 療養院的門跤口，親人真緊就離開--去，tō 無 koh 再過問；看著這種情形柏德琳院長就趕緊將病人攬牢牢安慰 in 講：「丸山療養院會kā 你 ê 病照顧 kah 好--去為止，你身體若好勢了後，就會當轉去厝--裡過正常 ê 生活--ê！」

柏德琳院長對待肺癆病人 ê 原則是愛尊重患者。接觸患者 ê 時袂使掛喙am、手lông，袂使看患者無目底。大部分 ê 患者 lóng 是散赤人；患者需要 ê 醫藥費用、營養補給品等等，柏院長 lóng 費心攢 hōo 夠。伊重視病人 ê tsia̍h-si̍t，要求灶跤愛定定變換菜色。病人阿公面憂面結想欲食肉酥，柏院長就隨騎 oo-tóo-bái 去街仔買轉來 hōo 伊配飯。

柏德琳修士 tī 台灣服務52年 lóng bô 領薪水；有人問伊「若準有薪水通領，愛偌 tsē 才拄好--neh？」，伊講：「無價！上帝 ê 疼痛是無價之寶。」

璇石喙笑彌勒

柏修士有一支「璇石喙」真 gâu lāng-tshuì-hue；伊 nā 看著阿公 tō 講台灣話，看著榮民 tō 講華語，原住民 ê 話嘛會曉2、3種。伊知影患者心靈 ê 痛苦比肉體 ê 拖磨 koh khah折磨；伊定定激悾激戇--ê 講笑詼、練痟話、koh 唱意大利民謠「'O sole mio」hōo in 聽 kah 心花開開開，袂記--得病痛 ê 痛苦；伊 koh 會 sai-nai 叫年歲 kah 大 ê 老人「阿爸！」、「阿母！」叫 kah 老人心情是茫su-su--ê，患者 kā 伊號做「濟公」iā sī(也是)「笑彌勒」。

阿媽數念(siàu-niām)欲去廟--裡拜拜，伊 tō 會駛吉普仔(jì-puh-á)車載阿媽去買果子、香燭通好拜拜之用，伊甚至會曉解說籖詩 hōo 阿媽聽；tńg 到療養院分果子 hōo 逐家 ê 時會講拜過 ê 果子食了會保平安--ooh！伊親身 kā in 飼藥飼飯，交代同事講話愛 khah 細聲--ê，行路跤步愛放 khah 輕--ê，才袂吵著 tng-teh 睏 ê 病人。

患者若吐血 ê 時，第一个趕到--ê 一定是柏院長！伊會先用衛生紙 kā 喙拭 hōo 清氣。患者若有血角牢（tiâu） tī 嚨喉内，伊會用手去 kā 血角jîm--出-來。患者若是氣喘袂離強 beh 斷氣 ê 時，伊 kan-na 用兩沿 ê 紗布 kā 喙隔開，做喙 tù 喙 ê 人工呼吸，一直到患者狀況穩定了後才放心離開。Bat 有一個患者一直 teh 等牽手 kah 囡仔來探訪，等 kah 心情鬱卒，伊 kā 院長講想欲 tńg 去厝--裡看-看--leh，院長 tō 特別準備 sàng-sòo-tháng(酸素筒，中國語-氧氣筒)、藥品、大筒射；當當(tng-tong) 救護車載伊到厝 ê 時，厝内 ê 人隨 kā 門關--起-來！挵門 mā 無人 beh 應。逐家無功而返 ê 第3工，老先生 tō 過身--去；因為被放棄 ê 人是完全失去活--落-去 ê 動力--ê。

配合民情 hōo 患者有尊嚴--ê 離開世間

柏德琳 lóng-tsóng 照顧過7000外个肺癆病人，可惜--ê 是有2000个病情沈重，無藥通醫；in tī 柏德琳修士 ê 祈禱中有尊嚴--ê 離開世間。伊 bat 替200外个亡者換壽衣；有 ê 家屬要求愛照民間 ê 風俗穿七沿 ê 壽衣才會使。伊送大體 tńg 去喪家 ê 時會照風俗一路 huah-hiu「上車--ooh！」,「過橋--ooh！」、「到厝--loo！」，hōo 悲傷 ê 喪家感動萬分，對這个阿啄仔了解咱民情，致上萬分 ê 欽佩。

tiau-tî起tī市中心ê老人中心

柏德琳 tī 意大利有一位事業成功 ê 契母，特別按意大利來到羅東看--伊。看柏德琳 ê 生活傷過虯儉內心真 m̄ 甘，tńg 到意大利寄來一大筆錢 hōo 伊通用。「丸山療養院」是柏德琳一世人 ê 心血，tī 伊 ê 拍拚之下，肺癆病 ê 患者 lóng 完全恢復健康--ah！療養院 ê 建築 mā siunn 過舊,「丸山」已經完成階段性 ê 任務--ah 。伊 tō用意大利契母寄來 ê 錢去三星鄉 ê 街仔買一塊土地，beh 起一間聖嘉民老人長期照顧中心。吳念真導演 tī 訪問中問伊：「Thaì會有人 tī 市中心起老人中心--neh？」柏修士講台灣 ê 老人愛鬧熱，愛去菜市仔、愛去廟--裡拜拜、愛 tuà tī 離病院 kah 近 ê 所在；老人中心若是起 tī 山頂尾溜，tō kán-ná sī kā 老人 khng tī-leh 等死 ê 所在。

52年ê台灣人生破病離開是無欲造成台灣 ê 負擔

2003年柏德琳(69歲)得著內政部頒發 ê 永久居留證 kah 第十屆 ê 國家醫療貢獻獎。 2007年意大利總統頒發騎士(khî-sū) 勳章表揚伊對國際救援事工 ê 貢獻。 2009年 ê 熱--人，聖嘉民老人長期照顧中心落成--ah。上愛鬧熱 ê 柏德琳修士 suah 破病--khì，伊離開伊心所愛 ê 台灣，tńg 到無啥人熟似 ê 意大利。

伊講「離開是無欲造成台灣 ê 負擔，無 beh 勞煩逐家！雖然心肝内是真 m̄-甘--ê 愛離開 tuà 超過52年 ê 台灣，m̄-koh 伊已經真滿足 mā 真充實，真福氣 tī 台灣有做淡薄仔代誌！」