063-柯子彰-台灣ê草橄欖球王：

佇日治時期有一个緣投、飄撇ê青年，23歲tō當選為日本國家草橄欖球隊ê隊長，這个身軀穿13號球衣，hōo日本媒體評論是「台灣來ê奇才」，是草橄欖球界ê寶貝，伊tō sī台灣草橄欖球會ê創會元老，柯子彰先生。

(眼睛讀台語有點吃力? 用耳朵聽台語柯子彰的故事)

基督教家庭出身

柯子彰是1919年出世佇台北ê大橋頭，老爸柯保羅是虔誠ê基督徒，老母是大稻程教會ê第一代信徒廖齊ê大漢查某囝，保羅ê大兄娶馬偕博士ê第二查某囝偕以利為妻，in lóng sī台灣初期ê基督教家庭。1918年規家伙仔搬去福州做生理，柯子彰去讀日本人讀ê東灜公學校，伊自細漢身材生做誠kuân大，koh有運動天份，畢業了後去日本京都基督教同志社中學就學ê時，hōo學校ê草橄欖球教練發現，伊176公分ê kuân大體材kah勇健結實ê身體，是天生ê運動人才。

京都同志社中學時期 天生奇才

柯子彰一接觸著草橄欖球tō真佮意這款運動，伊認真--ê練習加上體力好、速度緊，教練安排伊佇球隊第13號位置ê右後衛（正鋒），是球隊--裡上重要ê攻擊手，身穿13號球衫ê柯子彰，便若比賽lóng有傑出ê表現；因為有柯子彰ê加入，同志社中學校ê草橄欖球隊liân-suà三年得著全國第一名，hōo球評講伊是超過中學實力ê選手，甚至講伊是亞洲上有潛力ê13號攻擊手；中學五年ê時伊越級去參加同志社大學草橄欖球隊ê關西地區對抗賽。

13號殺手：早稻田的王牌正鋒

同志社中學畢業了後，校長、體育老師hām教練lóng苦勸伊留落來大學ê草橄欖球隊--裡，m̄-koh伊認為應該愛去運動環境koh khah成熟ê東京都，東京是國際都市，定定有國際比賽佇hia舉行，是一个ke khah有競爭，iā sī khah有挑戰性ê所在。伊上意愛--ê tō sī私立ê貴族大學早稻田（tsó-tiū-tiân），伊是用一般人士ê學科成績考入去出名ê商學院，可見除了會曉運動以外，伊ê學科成績mā sī佇一般人之上。伊佇入學註冊ê時馬上hōo大學ê草橄欖球隊招攬入去球隊--裡，教練仝款kā伊安排佇13號右後衛（iā sī正鋒）ê位置。13號這个號碼佇歐美是一个禁忌，是殺手ē代號；m̄-koh對草橄欖球來講，13號是一个mé-lia̍h （猛掠）ê殺手，是隊--裡上重要ê kioh-siàu（腳數）。自柯子彰加入去球隊了後，in lian-suà 兩年戰贏強手明治大學。

日本國家代表隊隊長 遠征加拿大獲勝

大學二年ê時柯子彰hőng選入去拄柱成軍ê國家代表隊，欲去加拿大遠征；當地ê日本僑民lóng足煩惱一旦落去比賽，恐驚會輸hōo體格大叢ê加拿大人，án-ne日本僑民ê面子tō ē siah落地--looh！這个由柯子彰領軍hőng無看上目ê球隊，竟然以6勝1和ê亮麗成績完勝白人ê球隊，hōo tuà佇加拿大ê日本僑民真有面子，行路有風。柯子彰ê消息傳到故鄉台灣，mā引領台灣各地紛紛成立草橄欖球隊。柯子彰除了有天生ê領導力，做決策ê時mā真明快；伊獨門ê「搖晃戰法」定定hōo對方sa-bô-tsáng，伊用快速ê傳球手法，除了擾乱對方ê防守以外，並且會使趁機會攻擊，這款戰術往往會hōo對方ê頭殼mooh tī-leh燒。

柯子彰旋風

生做緣投、飄撇ê柯子彰gâu講笑詼，認真ê個性、拍拚ê精神、koh有協調球隊ê能力，大四、大五兩年lóng sī早稻田大學草橄欖球隊ê隊長。佇伊ê領導之下，球隊liàn-suà兩年得著全日本ê冠軍，以伊23歲ê年紀tō hōo日本國家代表隊選為隊長，是歷年來上少年ê隊長；代表隊迎戰實力堅強ê澳洲隊，寫落來1勝1負ê好成績，4年以來伊lóng代表關東隊去hām關西隊對抗。日本ê草橄欖球界時行一句話：佇柯子彰進前無人像伊hiah gâu，佇柯子以後無人有可能kah伊仝款。柯子彰旋風連民風純樸、保守ê日本女性，看著柯子彰mā會擋袂牢--ê，大聲喝咻Kha！Kha！Kha！（“kha” tō sī柯姓ê日本發音。 ）

永遠的13號

日本媒體評論伊是「台灣來ê奇才」，1933年、1934年這兩年之間，伊登錄為日本ê風雲榜人物。台灣報紙報導伊是「永遠ê天王巨星」，無論佇日本iā sī國際，伊lóng sī重要ê kioh-siàu。早稻田大學特別kā草橄欖球隊以「13號欠番」 來表彰柯子彰對學校ê貢獻。（13號欠番tō sī kan-na柯子彰會當使用ê號碼。 ）1975年日本草橄欖球界為著beh慶祝草橄欖球傳入去日本75週年，特別選出75年來草橄欖球15个位置--裡上好ê選手；柯子彰入選歷年來上讚--ê 13號位置「右後衛 正峰」，tse是草橄欖球員一生上大ê榮譽。到今，老一沿--ê猶會記--得“kha” ê大名，一直到伊91歲離開世間為止，日本ê媒體iā一直會專程來台灣探訪這位運動ê天王巨星。

滿州鐵路工程師 草橄欖球播種者

大學畢業了後，伊hōo日本政府派去滿州建設鐵路，每到一个所在，伊tō成立一隊草橄欖球隊，佇工作期間lóng-tsóng設立大連、撫順、吉林、瀋陽等8个隊，mā主辦8隊交流戰ê比賽，伊佇工作中熟似同事橋本鶴代，橋本小姐hām柯子彰結婚後，馬上改名為柯秀鳳，認同家己是台灣新婦。

戰後回台 創立鐵路局球隊

二次大戰後ê1946年，36歲ê柯子彰hām夫人秀鳳轉到台灣，伊去台灣鐵路局tshuē頭路ê時，局長陳清文拄好是一个草橄欖球迷，一聲tō認出心中ê偶像，馬上聘請柯子彰為鐵路局ê專員；伊tō利用專員ê身份，成立第一个工商界ê球隊「鐵路局隊」，定定hām建國中學球隊kah淡江中學ê球隊交流比賽。伊koh創立台灣草橄欖球協會，並且加入去國際草橄欖球總會；伊積極--ê kah韓國、泰國、日本進行交流比賽，4个國家聯合成立亞洲草橄欖球協會，柯子彰推捒運動外交以外，mā提升台灣佇國際上ê地位。

二二八風暴中沉默知識份子

1947年二二八事件發生，行政長官陳儀下令封鎖主要ê道路，kā台北市對外ê交通，全省ê鐵路交通中斷--去，致使米糧運輸困難，看著米甕仔ê米愈來愈少，部分民眾去霸佔糧倉，造成市民ê浮動kah不安。當時鐵路局ê局長陳清文無tī-leh台灣，鐵路局無頭人通好領導，柯子彰hām同事提議成立「鐵路制度調整委員會」來維持鐵路ê秩序kah營運，mā得著行政長官陳儀之同意。

3月4日下晡4點30分第一班運送米糧ê火車，由新竹駛入到台北，平息一場台北城缺欠糧食危機，3月10日蔣介石下令ê掃盪部隊來到台灣以後，陳儀有軍隊做靠山，tō kā面漆--落-來，宣布「鐵路制度調整委員會」是不法ê組織。柯子彰是日本時代ê知識份子，娶日本某iā sī台灣出各ê人士，這款ê人上蓋hōo反日本人ê外省人刺鑿(tshì-tsha̍k)。In講柯子彰是參與叛亂秘密召集委員會，企圖破壞軍車ê運送，調查人員tshuē伊去審問幾落擺，佇嚴刑迫供ê凌治之下，伊m̄講任何一句話，家己承擔一切ê壓力。到尾雖然被放--出-來，伊從來m-bat對人講過hőng凌治ê情形。就此以後伊不談政治，專心推sak草橄欖球；身為草橄欖球協會會長，伊kā南部ê長榮中學,、南英、六信、三信等球隊組成聯盟，定期--ê舉行比賽。希望透過草橄欖球ê訓練，hōo球員有責任、有涵養、有智慧、有學識，會當刻苦耐勞、努力奮鬥，可惜--ê是中國國民黨政府無要意這項運動，柯子彰ê會長職務佇1975年mā hōo别人代替--去--ah。

森茂喜與森喜朗的故事

這段期間伊定定hōo日本ê隊友邀請去日本訪問，伊hām早稻田大學ê隊友森茂喜感情上蓋好，定定去in兜tuà，柯子彰hām伊e後生森喜朗真會合，柯子彰鼓勵伊去拍草橄欖球，伊講拍草橄欖球對少年家是一種真好ê團體訓練，森喜朗真敬佩這位長輩，kā伊當做是人生ê導師。森喜朗首相退休了後，擔任亞洲草橄欖球協會ê會長，2003年ê時森喜朗訪問台灣，佇駐日大使羅福全ê陪同之下，去柯子彰先生ê墓前燒香致敬，並且贈送1930年代柯子彰hām森茂喜兩位佇早稻田大學草橄欖球隊--裡，留--落-來--ê精彩ê生活相片簿仔。

台日關係的象徵人物

李登輝總統會當去日本治療心臟病，tō sī由首相森喜朗批准通過--ê，2020年森喜朗以83歲ê高齡代表日本來悼念李登輝總統時，表示老爸森茂喜hām柯子彰先生是球友，in兩人鬥陣佇早稻田大学jiok仝一粒草橄欖球，tse tō若親像森喜朗hām李登輝鬥陣teh追求亞洲ê和平仝款，伊希望兩國ê友情會當一直鬥陣落去。森茂喜老先生過身去ê時，好友柯子彰bat專工去日本ê金澤送好朋友上山頭。

活出紳士精神

台灣草橄欖球明星柯子彰先生佇2001年以91歲ê高齡過身--去，伊kā一生奉獻hōo草橄欖球，佇過身前猶koh提示講：草橄欖球是紳士ê運動，佇比賽中愛有赢球ê信念，m̄-koh mā愛尊重對手，袂使出漚步，比賽結束後無論輸贏逐家lóng sī朋友，tse tō sī草橄欖球ê精神。