064-巴克禮牧師 Thomas Barclay-一生獻 hōo 台灣 ê 語言教育家

台灣 ê 第一份報紙是按怎印--出-來--ê？第一台印刷機 koh 是按怎組--起-來--ê？M̄ 捌讀過冊 ê 序大，又 koh 是按怎有法度家己讀聖經、看報紙？

做伙來聽 Kā 一生獻  hōo 台灣 ê 語言教育家--巴克禮牧師 ê 故事，答案 tō tī 故事內底!

(眼睛讀台語有點吃力? 用耳朵聽台語巴克禮的故事)

蘇格蘭天才少年 立志獻身傳道

巴克禮是1849年出生 tī 蘇格蘭 ê 格拉斯哥--ê。老爸是一个布商，虔誠 ê 基督教會長老。巴克禮天資聰明，15歲 ê 時 tō 進入去大學，伊精通數學 kah 物理，特別對電氣學有趣味，彼時電氣化 ê 時代拄拄開始，伊發表 ê 電氣學 ê 論文，hōo 大英百科全書列為當代 ê 科學人才；皇家學士院 mā kā 伊登錄 tī 名人錄內底。1865年太平境教會 ê 成立，伊拄好是16歲，tō 決心欲獻身 hōo 主，而且 tī 逐年 ê 生日 lóng ē tī 獻身契頂 kuân 簽名，表明伊欲繼續獻身 hōo 主 ê 心志。

受差派來台灣 教人學白話字

1869年巴克禮20歲 ê 時進入去蘇格蘭神學院讀冊，畢業後 koh 去德國深造神學一年。1874年9--月奉太平境教會 ê 指派，24歲 ê 巴克禮由 Live Pool 坐船出發，三個月後才到廈門，用羅馬拼音學台灣人講 ê 台灣話，1875年6--月到打狗 ê 旗後（旗津），hām 李庥(Lí-Hiu)牧師實習傳佈福音 ê 方法。太平境教會要求伊愛培養本地 ê 傳教士，巴克禮 tō tī 伊 khiā-ke ê 樓跤，開設教人學白話字 ê 課程。

幽默回應仇視

有一擺，巴克禮去屏東二崙 ê 客家庄傳教，tī 禮拜 ê 講道中，突然間--ê 去 hōo 幾若个反基督教 ê 民眾，提8桶 ê 大肥 puah tī 伊 ê 身軀頂。雖然受著侮辱，伊猶是冷靜--ê 對 hia-ê 暴徒講：「Tsiânn 拍損！Tsia-ê 大肥若 ak tī 田--裡做肥，毋知偌好--nih!」。

移居台南，創立神學院擔任院長

1876年南部教會決定欲放棄打狗地區 ê 宣教，以台灣府（台南）為英國長老教會唯一 ê 宣道區，巴克禮 tō 由旗後 suá 來到台南。伊利用舊樓病院無人用 ê 禮拜堂做教室，吸引著16个來學神學 ê 人，巴克禮 kā 教室號做 「Tua-o̍h」（大學），這 tō sī 神學院創辦初期 ê 狀況。1878年英國長老教會決定欲創立有學制 ê 正式神學院，in 出2,652箍，英國 ê 太平境母會出資2,230箍，其他不足 ê 部份由台南太平境教會負擔463箍。3年後，新 ê 校舍有15 个學生報名參加，由巴克禮擔任院長。伊一直做到78歲。

推動白話字讀聖經

巴克禮到台灣 ê 第一信念，tō sī 欲 hōo 信徒會曉家己讀聖經，唯一 ê 方法 tō sī 用白話字代替漢字。白話字是拼音式 ê 文字，世界大部份 ê 國家 lóng sī 用這種拼音式 ê 文字，來作為文書記載用--ê，是一種 khah 進步 ê 文字系統；白話字差不多學一個月 tō 會曉--ah! 推-sak 白話字上重要 ê tō sī 愛有刊物出版，才會達到造福信徒，發展教會 ê 目的。

建立台灣第一間印刷所-聚珍堂

1880年先輩馬雅各牧師贈送 ê 羅馬字印刷機已經運到台南--ah；m̄-koh 無人會曉安裝，無人會曉印刷 ê 技術。巴克禮牧師 tō 利用回國休假 ê 時，去故鄉格拉斯哥 ê 印刷所學 khioh 字 kah 排版 ê 技術。Tńg 到台灣後，伊 kā 機器裝 tī 新樓病院 ê 一間房間--裡，kā 號做「聚珍堂」，mā 有人叫做「新樓冊房」。這間「聚珍堂」是台灣第一間 ê 印刷所。

《台灣府城會報》的誕生

巴克禮派蘇沙去汕頭學印刷 ê 技術，蘇沙生做聰明伶俐，三工 tō 學 ē 曉白話字--ah，一個月 tō ē 曉 khioh 字 kah 排版 ê 技術。1884年清法戰爭 ê「西仔反」，造成台灣 hōo 法國封鎖4個外月，傳教士 lóng 走去廈門 bih，一直到1885年 ê 七--月才由巴克禮 ê 主持之下「台灣府城會報」ê 第一號正式--ê 出世，這份報紙無論 tī 台灣 ia̍h-sī 東南亞 lóng sī 發行上久 ê 報紙；內容相當--ê 豐富，除了教會 ê 活動消息、屬靈 ê 文章供養信徒靈性 ê 生活以外，mā 有報導世界發生 ê 大事，koh 有有關台灣 ê 代誌、台灣 ê 民俗風情等。136年來是台灣人文活動重要 ê 記錄，後--來改名做「台灣教會公報」，tī 1969年 hōo 中國國民黨政府禁止使用白話字，教會公報不得不改用華語編寫一直到今。這台古董 ê 印刷機，這馬 khǹg tī 巴克禮創辦 ê 長榮中學--裡。

1895年出面hām日軍交涉 拯救台南免於屠城

日清戰爭後 ê 1895年10--月，日本軍 beh 去接收台南 ê 時，台灣民主國第二任大總統黑旗軍 ê 劉永福，tī 台南 ê 大天后宮設立總統府，準備欲強力--ê 抵抗日本軍；乃木希典將軍得著消息，伊特別集合兩个精英師，準備欲 tī 台南 kah 台灣人捙拚。這時 ê 劉永福提著百姓捐hōo 伊欲買武器 ê 黃金，suan tńg 去唐山，留落來滿面驚惶 ê 台南市民。台南 ê 士紳恐驚無人領導 ê 台南，會去 hōo 失去控制 ê 日本軍屠城；士紳 tō 去懇求巴克禮 kah 宋忠堅兩位西洋牧師，去 hām 乃木希典將軍交涉，in 兩人得著乃木將軍 ê 保證，袂有流血屠城 ê 行為，日本軍 mā 會保護台南 ê 古蹟等等 ê 好消息。巴克禮毋驚危險，見義勇為--ê 平息一場災難，hōo 台南人真正感動。

重譯新約聖經，獲格拉斯哥大學博士

1912年台灣南北 ê 兩个中會，tī 台中州 ê 彰化合組成「台灣大會」，大會聘請台南神學院院長巴克禮牧師，kā 已經過時 ê 廈門話 ê 新約聖經，用 khah 現代化 ê 用字，kā 新約聖經重新--ê 翻譯。63歲 ê 巴克禮用4年 ê 時間，tī 伊67歲 ê 時，才完成現代聖經 ê 工課。這項偉大 ê 成就，hōo 故鄉 ê 格拉斯哥大學頒授神學博士 ê 學位。

翻譯舊約與《廈門音 漢英大辭典》

1921年巴克禮博士就任全英國長老教會 ê 第一屆總會議長 ê 職務。1927年伊(78歲)開始 kā 希伯來文 ê 舊約聖經翻譯做白話字；因為這擺 ê 工事 siunn 大，伊不得不愛放棄台南神學院院長 ê 工課，三年後，伊 kā 完稿送去 hōo 上海商務局印刷 ê 時，商務印書館 suah tī 中日事件中，hōo 日本 ê 炸彈炸歹--去--ah，印刷 ê 工課愛延長一年半，伊 tō 利用這段時間編寫 「廈門音 ê 漢英大辭典」ê 增補工課，聽候商務印書館印刷首版 ê 20本舊約聖經 ê 時，巴克禮博士，已經是84歲 ê 高齡--ah。

典範長存島嶼

巴克禮博士性情溫和，hōo 人感覺 tsiânn 有親切感。伊真重視教育，伊開設第一間 ê 西式中學，第一間大學，第一份報紙；伊用現代化 ê 文字，kā 舊約 ê 聖經翻譯做 khah 現代感--ê，這種 ê 成就，對基督教 ê 現代化，有無人通比並 (pí-phīng) ê 貢獻。伊佇台南動亂 ê 時陣，挺身擔任和平使者，hōo 台南避免一場大災厄。

台灣人永遠的懷念

86歲巴克禮自從24歲到台灣，已經有62年之久--ah。1933年10月5日，主 kā 伊 ê 靈魂接納去到天國。這工是南部教會設教七十週年紀念 ê 前十工。南部大會 tī 太平境教會舉行上 kuân 規格 ê「大會葬」肯定伊一生為台灣 ê 奉獻，傳播基督教福音 ê 重大貢獻。巴克禮博士安葬 tī 台南市郊三分仔 ê 基督教公墓。3,000外信徒沿路送伊上山。

2013年六--月台南市政府 kā 生態公園號名做「巴克禮紀念公園」。2013年巴克禮 ê 姪孫女 kā 伊 69年來 lóng 有簽名 ê 獻身契捐出來 hōo 台南神學院保存，hōo 後代人見物思人--ê 緬懷先輩 ê 心志。這份獻身契 mā 成做台灣神學院 ê 鎮院之寶。

文稿編寫：陳亞彤 校對：杜荷洲  李以如  蕭如娟