062-彭光理-台美外交ê靈魂人物

台灣tī關鍵ê歷史中，親像民進黨ê成立、蔡英文總統ê訪問美國，後壁lóng有伊走傱ê身影，不而過，伊ê名，suah毋是真濟台灣人知影。

伊是美國人，hōo台灣人叫做「阿啄仔」，自伊少年學會曉台語，kah台灣結緣了後，伊一世人ê運命就一直kah台灣分袂開；台灣ê運命，mā仝款hōo伊影響，無伊鬥相共會加真艱苦。伊是台美外交關係後台牽紅線ê媒人「公」，伊是民進黨tī華府ê聯絡人，伊ê台語，講kah比真濟台灣人koh較輾轉。Tsit-má，咱就來聽這位犧牲奉獻，恬恬為台灣外交拍拚ê美國人，Michael Fonte彭光理先生ê故事。

(眼睛讀台語有點吃力? 用耳朵聽台語彭光理的故事)

uì 紐約布魯克林到台灣

Michael Fonte是成長tī紐約市ê布魯克林區，爸母是由義大利移民去到紐約ê天主教信徒。Michael高中tsi̍t畢業tō去紐約ê Mary Knoll神學院讀冊，立志beh做扶弱濟貧(Hû-jio̍k-tsè-pîn)ê神父。1967年被羅馬天主教冊封為神父後，分發到台灣為農民服務，開始實踐伊ê志向。

講台語ê阿啄仔

從來m̄-bat看過水田ê Michael來到亞熱帶ê台灣，tī教會ê安排先去台中ê Mary Knoll語言中心學台語；一禮拜5工，1工上課6點鐘，連續讀9個月了後，就會曉聽、講、讀、寫台語。少年ê Michael便若騎鐵馬出門，庄--裡ê囡仔tī遠遠看著伊就會喝咻「阿啄仔!」聽候伊落車hām in 講話ê時陣，逐家lóng ē掣一趒，講：這ê阿啄仔汰會曉講台語--neh？古意ê庄跤人便若有人嫁娶辦桌ê時，lóng會請伊去食桌；食kah腹肚圓滾滾 ê Michael講：台灣人重朋友，重家庭koh愛食好料，kah義大利人tsiânn相仝。

對戒嚴時代失望 轉去美國

名號做彭光理 ê Michael hőng分發到村民lóng 是講台灣話ê竹南kah苑裡。彼當陣，台灣猶是tī leh戒嚴期間，ta̍k-ke心頭lóng有白色恐怖ê驚惶，百姓ê心內lóng有一ê警備總部；無論講話、做代誌lóng ài khah細膩，才袂hőng lia̍h 去關。彭光理雖然知影這是不公不義ê現象，m̄-koh卻無可奈何、無才調去改善狀況。三年後伊tsiânn失望--ê離開台灣，轉去美國tī密西根州 Ann Arbor 密西根州立大學東亞研究所深造。

Tī密西根大學熟似彭明敏kah林宗義

Tī 密西根大學伊熟似兩个影響伊一生ê台灣人，一ê是彭明敏教授，伊原本是台灣大學政治系主任；tī 1964年伊hām學生共同發表《台灣人自救宣言》被判8年，伊tī軟禁ê期間，得著國際特赦組織ê幫贊，化裝了後成功脫離國民黨政府ê監控，飛到自由ê瑞典。這擺ê神奇旅行，轟動世界ê人權組織。另外一位是傑出ê精神科醫師，聯合國世界精神衛生聯盟ê主席林宗義教授，伊tī 1972年hām黃彰輝、黃武東、宋全盛發起「台灣人民自決運動」，主張台灣ê前途愛由台灣人民來決定，hōo中國國民黨政府列為海外烏名單人士，伊就是228大屠殺受難者臺大文學院院長林茂生ê公子。林宗義教授mā tī 密西根大學擔任精神科醫學教授。林宗義， Michael hām 彭明敏 in 3 ê講台語ê人，定定做伙開講。彭光理講hām兩位教授學--著ê台灣歷史、文化kah政治智識，比伊tī台灣3年所學--ê，hām東亞研究所學--ê加--khí-lâi koh較濟。

走入華府 成做台灣外交ê美國朋友

碩士畢業了後，Michael 前後佇Michigan、加州食頭路幾落冬，1984年才轉去華府替無仝ê團體做外交政策ê分析。Tsiânn拄好，彭明敏教授彼陣mā去華府做台灣人公共事務ê工課，兩人再度結緣。

FAPA時代 台灣人遊說美國國會ê重要角色

1984年彭明敏當選台灣人公共事務會，也著是 Formosan Association for Public Affairs （FAPA）ê 第三任會長。FAPA是tī美國從事參眾兩院遊說ê台灣人團體，希望借美國國會ê力量，影響美國ê行政部門，支持台灣ê國防安全kah台灣人ê權利。彭教授特別邀請熟似美國國會生態ê彭光理，做FAPA英文通訊ê編輯。

美麗島事件kah「台灣民主委員會」ê誕生

1986年FAPA邀請甘乃迪（Edward Kennedy），索拉茲（Stephen Joshua Solarz），李奇（James A. Leach），裴爾（Claiborne Pell）等等參加美麗島事件受刑人家屬ê記者會；接待受刑人家屬周清玉kah許榮淑ê工課，就是由彭光理安排--ê。這 3 ê講台灣話ê人，tī美國真緊就成做好朋友--ah。

民進黨ê產婆

記者會後，tī現場ê國會議員馬上成立「台灣民主委員會 The Committee For Democracy in Taiwan」，由參議員甘乃迪kah裴爾擔任榮譽主席，眾議員索拉茲kah李奇為聯合主席來促進台灣ê自由、民主kah人權。這ê由美國議會主動成立ê「台灣民主委員會」hōo台美人非常感動，mā鼓舞台美人繼續為台灣拍拚。海外人士ê拍拚，感動tio̍h台灣ê民主人士。4個月了後，台灣黨外人士tī臺北圓山大飯店宣佈成立民主進步黨，來挑戰袂使設立政黨ê無理法條。周清玉隨敲電話hōo華府ê FAPA 總部，請彭光理去請「台灣民主委員會」ê國會議員朋友，發表支持民主進步黨ê成立聲明。10工後美國眾議院外交委員會主席法索爾（Dante Fascell）發表聲明，敦促國民黨ài承認民主進步黨ê成立，並且ài廢除戒嚴法。民進黨就是tī 生狂ê海湧中成立--ê。民進黨產婆彭光理看著新生ê紅嬰仔安然出世活--lo̍h-lâi，內心充滿期待。

華府人脈經營

彭光理自1993 年tī「Council for a Livable World」做工課，這ê tī華盛頓特區ê理事會是由1寡研究核能ê科學家，in為著欲減少核能武器而成立--ê，mā主張各種武器ài受管制。猶毋過因為長短銃牽涉美國西部開拓ê歷史原因，受著傳統保留長短銃支持者ê反對。「生活好過日理事會」為著欲tī國會通過反對長短銃持有ê法案，in kā理念sio-siâng ê政治人物組織--khí-lâi，去參選參眾兩院ê國會議員；到目前為止已經有300外人bat進入去參眾兩院。彭光理伊長期tī理事會做工課，hōo伊kah美國ê參眾兩院有真好ê關係。

民進黨駐美代表

1999年FAPA ê 總會長陳文彥教授延攬這位tī華府人脈豐富ê台灣之友為資深研究員，全職為台灣做外交工課。2002年民進黨國際事務部主任蕭美琴請彭光理擔任民進黨駐華府ê聯絡人，代表民進黨hām美國人士溝通。彭光理講：伊是美國人，研究美國ê外交政策真濟年，較知影美國政府ê立場；同時伊mā了解台灣人ê期待kah需要，伊就是tī leh做媒人ê工課。

國際變局下ê艱難堅持

自從911恐怖攻擊事件以後，美國出兵伊拉克，同時koh ài應付北韓tshàng-tshiu ê行為，美國政府不得不ài遷就中國，來應付恐怖組織。國際局勢ê變動，致使台美關係受著真大ê損害。2008年民進黨tī大選中大敗，彭光理tī工課上愈來愈艱難--ah，m̄-koh伊猶原是照常代表民進黨出席各種智庫ê研究會，伊講kah無仝政治箍仔ê人交陪，就親像耍tàu-phìnn-á（鬥片仔）仝款，一片仔一片仔kā伊組合--khí-lâi，就會知影美國政府ê外交趨勢。

小所在，大外交

民進黨駐美代表處離白宮kan-na幾分鐘仔niā-niā，地點tsiânn好；辦公室約3坪ê大細，khǹg 3 塊辦公桌仔hōo 3 ê工作人員通做工課以外，就tshun無偌濟位--ah。M̄-koh「山不在懸，有仙則靈」，所在雖然有khah e̍h，卻發揮上大ê外交功效。

2015年蔡英文參選總統前ê華府拜訪，tō sī驗收民進黨代表處工作成果ê時陣--ah，隨團訪問ê台灣記者發現每工lóng有新ê驚奇，蔡英文會當進出白宮、國務院、國防部、國會山莊、CSIS智庫等等，tsia-ê所在lóng是資深記者m̄-bat去過--ê；蔡英文見著副國務卿亞太事務助卿等在職官員kah前任ê國務卿阿米塔會談。蔡英文tī國會山莊拜會麥肯等參議員，伊koh tī CSIS智庫發表一場深受美國學者肯定ê演講。由彭光理安排--tshut-lâi ê行程，hōo美國政壇發現蔡英文是一ê有治國能量ê人。

2016大選勝利：台灣民主ê歷史轉捩點

2016年，蔡英文以壓倒性ê票數當選為台灣總統，民進黨koh史無前例tī國會超過半數。彭光理心內真正激動，16年來ê拍拚終其尾達到目的--ah。民進黨ê大勝利，對重視實力ê美國政壇來看，藍色政治ê消沉，綠色成長ê民意，hōo華府koh khah注重民進黨存在ê價值。彭光理激動khà電話hōo好朋友林宗義教授ê查某囝林郁文講：「Lín老爸nā iáu-koh tī-leh，tsit-má一定會真歡喜，咱ài 進一步kā轉型正義tī台灣實現。」

世代傳承

2024年，彭光理感覺家己已經無少年時遐爾猛醒，決定退休。Tī 2021年，伊就已經聘用30 thóng歲ê辦公室副主任吳迪，新任ê代表蕭舜文mā是uì 2013年就tī代表處做幕僚。彭光理kā伊38年台美外交ê經驗傳承hōo後輩，hōo濟濟少年人會當koh繼續奉獻家己，認真推捒台美外交關係。

彭光理bat獻身為神父，從事弱勢族群ê服務；āu--lâi雖然無koh做神父--ah，m̄-koh伊追求社會公義kah世界和平ê心，依然存在。感謝上帝！Hōo台灣hām伊結緣。伊熟似真濟心懷社會責任ê台灣朋友，hām in tī台灣邁向民主ê道路中做伙行。彭光理kā真理、公義、和平ê種子掖tī台灣ê塗跤兜，成功發穎、釘根了後，已經成做一欉大樹欉--ah。 (點圖片聽故事⬇️)

文稿編寫：陳翔容 校對：林琪蓁、盧彥廷、許毅全