055 蔡正隆-拚死為台灣ê台獨運動者

tailoclassatl
Jul 3
8 min read

台文編寫：蕭如娟校對：陳亞彤李以如

kā 理念化做行動推sak台灣獨立運動 ê 先鋒者蔡正隆博士。伊用「骨髓、骨keh、筋肉」來譬喻「台灣語文、台灣政治、台灣文化」，這三項台灣獨立要素是互相牽連--ê。伊無惜破病 ê 身體 kah 時間走標, 所拍拚--ê lóng 是向台獨 ê 路前進，thsuā 領後輩延續這 pha 獨立 ê 風中燭火, m̄-tang 去 hōo hua--去！

1989 年 8 月 11 日，第十六屆世台會年會在高雄市舉行遊行活動，左起世界台灣同鄉會聯合會（世台會）會長李憲榮、葉菊蘭、台獨聯盟中委蔡正隆頭綁新國家運動頭巾遊行。圖片來源：截自邱萬興臉書

Gâu 讀册，愛交陪，好人緣

蔡正隆是1944年出生 tī 台中，伊一生讀册 ê 過程 lóng 是一帆風順；台中一中初中部、台中一中高中部、台大機械系、美國南卡羅來納州立大學碩士，一直 kàu 卡內基美隆大學機械博士。

伊漢草誠好，tō kánn-ná 像菜頭仝款勇健, 逐家 lóng 叫伊「菜頭」。菜頭有一个足疼伊 ê 老母，做警察 ê 老爸用傳統方式管教，不准囝兒序細去插(tshap) 政治。菜頭讀台中一中高中部 ê 時，定定 hām 朋友去拍網仔球、拍橋牌、騎車仔，無 siánn teh 讀冊，竟然會當考牢台灣大學機械(ki-hāi)系。伊當選台中一中 tī 台北 ê 校友會總幹事，除了辦郊遊、辦舞會之外 mā kā 校友募款來 ê 錢，提去創辦一份台中一中校友會刊，伊是非常有行動力 ê 人；菜頭天生熱情誠有人緣 koh 有疼心， mā 交陪外省人朋友，甚至紹介 in 去兄哥開 ê 工廠食頭路，伊是人人好 ê 紳士。

喜結良緣

Tī 賓州卡內基美隆大學讀博士 ê 時，經過同鄉柯耀宗 ê 紹介熟似葉明霞小姐。葉小姐 ê 求學過程 mā sī 真順範--ê；uì 北一女初中部、北一女高中部、台大化學系，一直到賓州美隆大學研究所 ê 碩士。In 兩人情投意合--ê tī 過轉年 ê 熱--人結婚。葉明霞是事業型 ê 女性，無愛 tī 厝--裡煮飯洗衫摒掃, 佳哉翁婿是休士頓出名 ê family man，煮飯、炒菜、摒盪(piànn-tn̄g)、騙兩个查某囝 ê 功夫 lóng sī 一流--ê， hōo 夫人明霞會當 tī 化學分析 ê 領域內有所發揮。Tī 菜頭50歲 ê 生日，同鄉合齊送伊上對同 ê 禮物就是一 khann 銑鍋 kah一條 uî-su-kûn-á。

自由民主 ê 思想開始發穎

留美 ê 學生雖然對台灣有感情，m̄-koh iáu 袂 hiáu 思考台灣 ê 未來。蔡正隆 tshím 到美國就是有先輩 ê 指點，自由民主 ê 思想才發穎--出-來，才開始來探討台灣不公不義 ê 原因，kah 認 bat 獨立建國 ê 理念。兩翁婆仔買厝了後，邀請留學生來厝--裡用開講、食飯、烘肉、拍球 ê 方式來開啟學生民主 ê 心門。彼時伊人生 ê 大事 tō 是去 Williamport (威廉波特) 替台灣少棒隊加油。好友美隆大學 ê 副教授陳文成會來鬥 giú「台灣加油」ê 布條仔，hām「中華民國加油」ê 布條仔相拼注。有一年甚至租一台小型 ê 飛龍機，拖「台灣獨立萬歲」ê 布條 tī 球場 ê 頂kuân 踅來踅去，實在是有夠爽--ê，m̄-koh 這項代誌 hōo 中國國民黨看 kah 真刺鑿(tshih-tshak)；國民黨 tō 去紐約 tshiànn(倩：雇用) 台灣海軍 ê 船員仔做拍手，便 nā 看著台灣人就拍，所以同鄉 lóng 愛同齊做陣，袂使孤鳥離群，nā 無會去 hőng 拍甲叫毋敢！想袂到看少棒比賽竟然是團結同鄉培養同志愛上好 ê 方法。

Tuè 時勢 tshuē 頭路

1979年全球能源危機發生，美國政府重點支持石油開採，發展休士頓 ê 石油化學工業。蔡正隆博士 mā tuè 著時機，tshuē 著 Exxon 石油公司開採工程師 ê 工作，夫人明霞 mā tshuē 著化學分析師 ê 頭路。

陳文成博士猝死 ê 影響

不幸 ê 消息傳--來，好友陳文成博士 tńg 去台灣探親 ê 時，hōo 國民黨政府 ê 特務 tshuā 去約談後，隔轉工規身軀傷痕累累--ê 死 tī 台灣大學 ê 校園內！一個30外歲有正義感、家庭美滿、出名大學 ê 副教授、有美好前程 ê 陳文成博士，beh 做一个知識份子 ê 良知，竟然 ē 被逼慘死；逐家才發現國民黨 jiàu-pê-á ê 手已經伸到美國 ê 校園、伸到台灣同鄉 ê 身軀邊--ah。

美國參議員 Mr. Jim Leach得著消息請助理 khà 電話 hōo 蔡正隆，邀請伊去美國 ê 國會， kā 中國國民黨 tī 校園內 jiáu-pê-á ê 行為， tī 美國國會作證，並且列入國會紀錄。這擺 ê 證詞 iā 成做調查陳文成教授命案上有力 ê 證據。正隆只不過是想 beh 盡做一个台灣人 ê 義務，suah hōo 國民黨政府列為海外烏名單人士。代誌既然發展到按呢，兩翁某規氣 tō 撩--落-去--ah，積極去參加台灣人 ê 公共事務。

成立臺灣學校

1985年伊擔任休士頓台灣同鄉會會長 ê 時，伊提議成立台灣學校來傳承母語台灣文化。伊講政治好比是骨骼，骨骼愛有筋肉來支持才有力量；台灣文化是民族 ê 筋肉，台語文 kok khah 是文化 ê骨髓，骨髓是生肉生血 ê 滋養中心，所以講台語運動才是台灣獨立的根本。休士頓台語學校快速 ê 發展真需要一間家己 ê 會館，蔡正隆會長得到 tsē-tsē 同鄉 ê 寄付贊助，買著現此時 ê 台灣人活動中心，伊 mā 同時當選為台灣人公共事務協會 (FAPA) ê 中央委員和台灣獨立建國聯盟 ê 中央委員。

突破海外烏名單回臺參加同鄉年會

1988年李登輝繼任台灣總統，這是台灣民主改革上好 ê 機會，爭取民主 ê 街頭運動 tī 台灣不斷舉行，海外志士 mā 想欲 tńg 去參加，無奈有烏名單 ê 限制，有志難伸。突破烏名單是當時海外志士 ê 第一个課題。首先由葉明霞、陳翠玉、張丁蘭、毛清芬、劉真真等女士組團回國，意外--ê 挵開國門成功 tńg 到台灣！In參加第一擺 tī 台灣舉行 ê 世界台灣人同鄉會年會， tī 會--裡聲援主張臺灣獨立被關 ê 蔡有全 kah 許曹德，並且由北到南做一連串 ê 宣揚台灣獨立 ê 演講。可惜--ê 是護理專家陳翠玉女士不幸--ê 破重病，病死 tī 伊思思念念--ê 台灣！有「夫人牌」ê 成功出擊 koh 有鄭南榕烈士自焚事件 ê 震憾，鼓舞著獨立聯盟 ê 男士；蔡正隆以「來福」ê 假名申請入境竟然成功--ê hām 世台會 ê 理事長李憲榮博士雙雙出現 tī 高雄舉辦 ê 世台會演講台頂，引起一片 ê 噗仔聲 kah 歡喜 ê huah-hiu。Tī 台中 ê 爸母 hām 小妹看著電視 ê 轉播，趕到高雄 hām 21年來 lóng 無見過面 ê 正隆見面；老母滿面目屎，責備伊講：「叫你莫插政治，你偏偏毋聽！」In tī 黨工 ê 嚴密保護之下順利--ê 全程參與世台會，也安排 in 兩人去全國各地演講，公開鼓勵台灣獨立。蔡正隆身軀 phāinn 一條青色 ê 彩帶，彩帶頂面寫「台灣獨立建國聯盟」，這是何等 ê 光榮--ê。這个 hōo 中國國民黨講做是青面獠牙 ê 台獨份子，四界受著台灣人 ê 熱烈歡迎。

世台會會長李憲榮及蔡正隆闖關成功，參加 1989 年於高雄舉辦的第 16 屆世台會。( 圖片提供：謝三泰攝影）圖片來源

8月27日正隆 hām 秘書長羅益世(也是烏名單人士之一)，坐 tī 盧修一教授 ê 車內準備 beh 去 hām 學生座談， tī 半路頂 hōo 侯友宜領導 ê 霹靂(pik-lik)小組, 用催淚瓦斯 kah 暴力 ê 手段, kā in 拍 kah 遍體鱗傷。雖然身上無錢、無行李、無證件卻 kā in 兩人送去機場，遣送出境。

1992年經過海外烏名單人士不斷 ê 闖關，引起了國際社會 ê 關心； koh 有國內 ê 民主鬥士 ê 拍拚，刑法100條最後被廢除！「烏名單人士」這五字成做歷史名詞， tàn 去 tī 太平洋--裡！

健康出現問題

蔡正隆一向身體勇健，有運動ê 慣勢 koh 注重食食；無想到人 ē 感覺 iá-siān 無元氣，體力 mā 愈來愈差；去病院檢查，頭起先 lóng 查無原因，尾仔才知是致 tio̍h 腰子病，腰子功能漸漸變 bái！

伊決定辭掉資深流體力學工程師 ê 頭路，專心接受化學治療 hām 做家庭主夫，家庭 ê 經濟 tō 由夫人明霞一肩擔當。伊心內掛意建國未成 ê 工課，tō 決定 beh 完成這个願望 beh hām 時間走標。出馬擔任台獨聯盟美國本部 ê 主席，伊特別看重學生 ê 盟員，去各州 ê 大學訪問、演講、座談，吸收 koh khah tsē ê 學生盟員，向望 in 轉到台灣會當推 sak 建國 ê 工課。

帶病為陳定南助選

1994年11月台灣舉行第一擺 ê 台灣省長選舉，這是「400年來 ê 第一戰」，民進黨推出陳定南參加競選，伊 ê 政見 tō 是若選牢了後， beh kā 台灣省政府廢除掉。蔡正隆真認同伊 ê 政見， tō hām 休士頓 ê 同鄉簡忠松做伙， tńg 去臺灣為陳定南助選。兩人駛一台台中支部撥--出-來 ê 台獨戰車，ná 助選 ná 宣傳台獨 ê 理念，一個月中間深入去中南部各鄉鎮；戰車 lóng 是蔡正隆駛--ê，伊拼老命 kah 時間走標，對透早到暗，從來 m̄ bat huah 艱苦，無怨無悔--ê。鬥陣 tńg--去 ê 簡忠松先生，便若講著這段經歷目屎 tō ē liàn--落-來！

母語運動行動派

蔡正隆 tī 台灣助選 ê 時發現臺灣人漸漸無 tī-leh 講台語--ah，這是有關國家安全 ê 問題。伊 tńg 到休士頓 tō 開始推出「喙講台灣話手寫台語文」 ê 運動；伊開始用台語寫報紙 ê 社論，這是新聞界第一擺有人用台語文寫社論--ê；伊講語文是思想 ê 根，欲做主人 ia̍h-sī 欲做奴才，介在欲使用啥款 ê 語言。歐洲各國 lóng sī 透過母語運動才獨立建國成功--ê。 政治獨立運動 ê 進前，愛先做母語運動才著。行動派 ê 蔡正隆 tō 開始籌備北美洲台語文夏令營。

無惜健康--ê 為台獨付出

1995年伊開始每禮拜愛洗一擺腰子，m̄-koh 伊 iáu-sī 用強烈 ê 意志 hām 病體搶時間；4--月 tńg 去台灣參加台灣獨立聯盟會議，5--月 tī 美國召開台獨學生聯盟會議，6--月伊 uì 紐約駛六點外鐘 ê 車到康奈爾，李登輝總統訪問大學 ê 時，伊 tī 學校門口宣傳台灣主權獨立聯盟 ê 活動。7--月開始一禮拜愛洗腰子兩擺！伊用人生最後 ê 時間召開籌備一年之久 ê 北美洲台語文夏令營，一時之間四界來 ê 台灣人、台語老師、台語文作家、台語文推廣者，lóng 聚集 tī 休士頓台灣人活動中心，盛況空前--ê hōo 蔡正隆非常 ê 安慰！逐家 lóng 答應追隨蔡正隆 ê 精神，去開拓台語 ê 新園地，逐家 mā lóng 誠 m̄-kam 看著蔡正隆強強欲火 hua--去 ê 性命!

蔡正隆博士所堅持 ê 台獨理念是絕對袂當拍折--ê；伊 ê 台灣文化獨立理論、伊 ê 台語文運動觀， lóng 是行 tī 政治運動者 ê 進前 ê 先知；先知通常是孤單--ê，會受著 tsiânn tsē ê 質疑 kah 挑戰，m̄-koh 伊並無失志，壯烈--ê 拚到最後一口氣，伊是台灣獨立運動珍貴 ê 稀有珍品，是 lán 台灣人 ê 典範，人人懷念 ê 運動導師！