058 台灣紅茶ê鼻祖：新井耕吉郎

tailoclassatl
Jul 4
6 min read

台文編寫：郭怡婷校對：洪偉婷、郭孟樺

印度錫蘭ê阿薩姆紅茶是世界公認上好ê紅茶；其實佇日治時期南投縣魚池鄉ê紅茶，已經tō kā阿薩姆紅茶ê品質比落去---looh！甚至佇921地震後，當地災民利用紅茶來重建災區ê經濟，短短ê時間內kā紅茶ê價值提懸到國際茶價ê 20倍。台灣ê紅茶是按怎來--ê？眼睛讀台語有點吃力? 用耳朵聽台語新井耕吉郎的故事

錫蘭紅茶種入台

新井耕吉郎是1904年出生tī日本ê群馬縣。伊uì北海道帝國大學農業科畢業了後，tī22歲ê時到台灣總督府中央研究所，中壢平鎮ê茶葉試驗所服務，開啟伊kah台灣紅茶產業pak袂離ê緣份，伊主要ê任務sī去發現佗位仔上適合種作錫蘭紅茶--ê。當時英國控制全球紅茶ê產量，為著beh反制英國對錫蘭紅茶ê壟斷，日本政府決定欲tī台灣種紅茶。適合種作紅茶ê所在，一年ê降雨量需要達到1500公厘以上，溼度愛tī 80％～90％之間，日--時ê溫度是攝氏20度kàu30度之間，土地是愛會當消水、tháu氣ê砂質土，酸度ê PH值4.5到6是上蓋適合。

十冬行跤揣著貓蘭山

新井耕吉郎四界去南北二路走tshuē上合紅茶種作ê所在；經過十年ê走傱，才tī日月潭一帶ê魚池鄉，tshuē tio̍h海拔800公尺、暝日溫差大、溼氣足ê貓蘭山，這个所在hām錫蘭紅茶ê原鄉阿薩母ê氣候、地形tsiânn仝，m̄-koh koh kah特別--ê是hia規年迵天攏bông-bū不斷，條件比阿薩母koh khah好，伊tō選擇tī魚池鄉試種錫蘭阿薩拇大葉種ê紅茶。

台茶8號ê出世

新井彼口灶ê大細uí苗栗suá來到「魚池紅茶試驗所」。伊引進錫蘭ê阿薩拇大葉種ê品種，hām魚池野生茶種交配，培育出新ê品種台茶8號；台茶8號kāu-tut-tut溫順ê喉韻，有麥仔透濫著肉桂ê芳氣，小寡澀澀ê滋味，tsham著糖kah牛奶了後，sī上蓋好啉ê奶茶。一推出tō受著國際人士ê歡迎，hōo南投紅茶ê名聲大響。新井開墾71公頃ê茶園，koh積極投入品種ê提升，kah產業ê管理，南投紅茶iā成做逐年進貢天皇ê御用珍品。

現代化製茶ê起頭

新井起一間模仿錫蘭式ê「持木製茶廠」，三層樓ê廠房是用上讚ê hi-nó-kih建造--ê，廠內ê luán茶機、茶綠切斷機、風選機、kan-sò機等等lóng sī uì英國進口--ê。新井mā無私--ê輔導民間ê會社，譬論：三庄製茶、東橫產業、台灣農業、中野商店等。伊m̄-nā提供in新品種ê樹栽，mā教in土壤ê評定、茶園ê管理等。南投紅茶ê產量面積liâm-mi tō達到1000公頃。1939年koh達到3,000公頃，佔台灣紅茶生產量ê 93％。當時南投紅茶ê外銷金額已經超過烏龍茶hām包種茶東方美人茶ê總額，成做重要ê外銷產業，替政府增加tsiânn tsē ê外匯收入。

家人三條人命ê代價

當時魚池ê衛生bái，環境差，蠓蟲、蚤母tsiânn厚；真不幸--ê夫人染tio̍h風土病，大囝佇15歲致tio̍h肺病，kah一歲ê細囝三个人lóng過身--去。新井hām獨生女玲子兩人強忍悲傷，繼續--ê留tī台灣經營南投紅茶ê事業。

無法歸鄉ê骨灰，換來台灣人ê感念

1941年二次世界大戰爆發，所有ê人力lóng投入去戰爭，世界ê經濟大受影響，南投紅茶ê銷路大減，茶園mā欠人管理。雖然如此，新井iáu-sī嚴求崗位，用上少ê人力照顧茶園，莫去hōo拋荒--去。

二次大戰後，中國國民黨接收所有日本人ê紅茶產業，歸為台灣農林公司經營管理。新井耕吉郎對南投紅茶用情tsiânn深，決定欲留落來台灣，kā伊所研究ê理論kah技術，完整--ê移交hōo國民黨政府。M̄-koh伊suah tī過轉年mā染著malaria過身--去。英年早逝--ê結束43歲ê人生，遺體tō佇茶葉改良所火化後，交由新井唯一ê後代新井玲子，kā老爸ê骨hu tsah tńg去日本群馬縣。玲子所坐ê船suah tī半路發生船難，佳哉hőng救--起-來保著性命，m̄-koh新井耕吉郎ê骨hu suah沉落去大海--裡。

消息傳到台灣，台灣魚池分所ê所長，為tio̍h欲感念新井耕吉郎一世人對台灣紅茶ê貢獻，一杯茶一世情--ê tī魚池ê茶園建造紀念碑，而且尊稱伊是台灣紅茶ê鼻祖。茶農mā kā新井當做土治公tī-leh守護貓蘭山仝款，不時會去紀念碑祭拜。18歲ê新井玲子轉到日本了後，無偌久tō嫁hōo櫻井清一，婚後伊真罕得提起老爸tī台灣所做ê一切；新井耕吉郎tī台灣受著尊重ê事蹟，tī日本suah無人知--ah。

百年後再相會

2011年奇美集團總裁許文龍到日月潭𨑨迌，導遊紹介魚池改良所ê新井耕吉郎紀念碑，許文龍聽著新井對台灣紅茶貢獻ê故事真正感動，台茶8號koh sī伊上kah-ì ê紅茶，伊竟然m̄知台灣有這號人物，實在是真見笑，伊tō決定欲親身為新井雕塑一尊紀念銅像；m̄-koh新井ê相片竟然lóng去hōo魚池改良所拍m̄見--去--ah。劇情ê發展tō kánn-ná天公伯仔tī-leh寫劇本仝款，無偌久，魚池鄉出現一位60年前新井ê部下竹下貝吉先生。伊來魚池舊地重遊，懷念去過去作穡ê所在，意外--ê發現有頂司（tíng-si）新井耕吉郎ê紀念碑，而且過去60年來魚池鄉ê茶農kā伊當做神明仝款咧朝拜，內心非常ê激動，tshiau出身軀頂3張新井ê舊相片；許文龍tō sī用這三張相片來雕塑新井耕吉郎ê半身塑像，伊kā翻成做4尊銅像，一尊囥tī魚池分場，一尊tshai tī日月潭風景管理區，一尊留tī奇美博物館，另外一尊欲送hōo新井ê後代人，m̄-koh獨生女玲子已經過身--去-ah，真可能tshuē無伊ê後代。同事竹下貝吉先生聯絡著63年前tī魚池小學讀書ê日本婦人人高良惠美，才聯絡著櫻井克義（也tō sī新井ê外孫）。2012年魚池分場紅茶文化展示館舉行紀念銅像揭幕（kiat-bōo）ê儀式，外孫櫻井克義夫婦hām查某囝翁某、竹下貝吉先生，kah 53年前tī魚池小學讀書ê日本婦人人高良惠美，lóng hőng邀請來到現場。

這段台日兩地人民一百年來ê交情，互相--ê感動tio̍h對方；tō親像啉一杯台灣紅茶，內心會感受tio̍h溫暖仝款，故事使人感動。

衰退期

世界第一ê台灣紅茶tī戰後20年期間，iáu-sī陸續--ê接tio̍h外銷ê定單。M̄-koh中國國民黨ê農林公司採用多角化經營ê策略後，in m̄-bat寶無要意經營台灣ê紅茶，茶農紛紛改種檳郎維生，名揚四海ê台灣紅茶tō行入去歷史--裡。

重生：極品台灣紅茶的誕生—紅玉

1999年九二一大地動，魚池鄉受tioh重大ê災害，農民生活陷入困難，這時上帝koh一擺--ê照顧魚池鄉ê農民：魚池分場培養出台茶18號「紅玉」，紅玉是採用新井耕吉郎研發ê方法，引進緬甸ê茶樹hām魚池ê山茶交配培育而成--ê。紅玉ê特色是泡--出-來ê茶水是金黃色透濫著一點仔粉紅色，茶水khǹg tī白色瓷仔杯ê時，杯喙會變做一沿淺綠色ê箍仔。一杯紅茶會當出現二種色水，實在有夠特別--ê。紅玉溫潤ê口感，m̄免tsham糖kah牛奶，芳氣tō足讚--ê，正港是紅茶界ê極品，是「巷仔內」ê茶道人士上kah-ì ê飲品。茶農堅持用有機ê栽培方法，一心兩葉ê紅玉是用人工挽--ê，雖然生產ê速度khah慢，m̄-koh有機ê種作方法卻有特有ê薄荷芳氣透濫著肉桂味。紅玉ê價數一台斤已經thiàng到5、6千箍--ah，是進口紅茶一斤90箍ê 60倍，產量猶閣是供不應求，khah早改種檳郎ê茶農，lóng復耕轉--來改種紅茶。

魚池ê三寶：紅玉、台茶8號、原生山茶

目前魚池鄉有三種紅茶，除了紅玉以外，koh有100年前ê老樹仔欉ê台茶8號，伊吸收地氣kah礦物質上tsē，回甘ê口感會停tī嚨喉，喉韻久久--ê退袂去，是紅寶石級ê級數；iáu有一種是魚池當地ê原生種，魚池山茶有蜂蜜ê氣味，也是珍貴ê稀罕品種。

以兔子標章標誌

紅茶每一季ê生長，tn̄g著雨水量ê無仝，茶葉ê品質mā會無仝，改良所為tio̍h欲確保消費者會當合理--ê買tio̍h好ê紅茶，用兔仔來做辨認ê標誌，3隻兔仔是好茶，5隻兔仔是極品，兔仔愈tsē品質是愈好。

世紀歷史的重生

台灣農林公司看tio̍h台灣紅茶ê時行，siòng tio̍h商機kā新井耕吉郎一百年前起ê錫蘭式「持木製茶工場」重新翻新，內部設有紅茶製造ê展示，100年前留--落-來uì英國進口ê銅製機器猶閣會當振動，日本製ê三菱牌電風tī天篷頂猶原--ê吹出涼風。看著持木製茶工場ê重生，見景思情--ê hōo lán懷念這位用一生懸命ê精神，kā伊人生ê精華歲月lóng奉獻hōo台灣紅茶ê新井耕吉郎先生。