059 辜--家ê爸仔囝
- tailoclassatl
- Oct 3
- 8 min read
台文編寫：盧彥廷 陳翔容 校對：許毅全、林琪蓁
辜顯榮ê家族tī咱台灣歷史內底，有真特別ê地位。
辜顯榮是按怎ùi一个艱苦囡仔，成做台灣上好額ê人？為啥物有人叫伊漢奸？
伊ê後生辜振甫tī國民黨時代，為著保持家族勢力，成做國民黨黨員。
猶毋閣伊ê小弟辜寬敏，suah行去做台獨運動。
欲了解這个家族tī咱台灣歷史扮演ê角色，感受台灣面對外來政權統治ê複雜性，就做伙來聽「辜--家爸仔囝」精彩ê故事！
出身與少年時期
辜顯榮是1866年出世tī鹿港，老爸早死，是由老母飼養大漢--ê。辜顯榮生做高tshiâng大漢，tsiânn-gâu變竅。少年ê時學過漢學，書法家己創新，自成一家。19歲ê時去臺北城做苦力（ku-lí）kkah做kng轎--ê。後--來開一間𥴊仔店「瑞昌成號」，uì鹿港用戎克（Junk）船載貨來臺北賣。
臺灣割讓hōo日本 辜顯榮送請願書hōo日軍
1894年，日清戰爭，清國戰敗，kā臺灣割讓（jiōng）hōo日本。大部份ê仕紳kah民眾lóng m̄-guān hōo異族統治，共議成立「臺灣民主國」由臺灣巡撫唐景崧（Tn̂g Kíng-siông）擔任大總統。當當日本軍來到宜蘭ê澳底（Ò-té），唐大總統提著民眾捐hōo伊欲買武器ê金條，化裝做阿婆仔，「阿婆仔làng-káng」坐船suan去廈門，放著伊ê廣東兵仔無通食，無錢通用，四界tī臺北府搶劫，hōo臺北城大亂。大稻埕ê頭人李春生、劉延玉等請日本軍緊入來臺北城維持秩序(tia̍t-sū)，in寫一篇請願書，m̄-koh無人敢提去hōo日本軍。這時，經營「瑞昌成號」ê頭家辜顯榮講伊做生理tshiâng-tsāi去基隆，對基隆真熟似，志願欲去送達請願書。辜顯榮到基隆大本營ê時，會曉講北京話ê文人、初代總督府民政局長水野遵kā伊接見，hōo辜顯榮會當表明來意，m̄-koh日本軍懷疑伊是間諜，無kā伊信táu。落尾，美國記者kah英國生理人mā去大本營，表明tī臺北城ê外國人mā lóng向望日本軍趕緊入城，保護in ê財產。
協助日軍鎮壓 初期仕途
辜顯榮tshuā北白宮能久親王ê部隊，一路剿滅抗日ê台灣人一萬兩千人，為日本政府立下大功。台灣總督府封伊做「台灣紳士」，koh hām民政局長水野遵去東京，接受日本政府賞賜ê「單光勳章」。隔轉年，樺山總督接受伊ê建議，借用清國ê制度每十戶成做一甲，每十甲成做一保ê「保甲制度」通好來控制台灣人民。伊hőng任命為台北保甲總局局長，hōo台灣人叫伊漢奸。毋過，這个佇台灣人佮日本政府中央撨代誌ê「漢奸」，起初並無受著所有日本人ê信任，辜顯榮bat因為小可代誌佇台中hōo日本ê地方官員關入籠仔內59工，落尾才kā伊交予台北法院發落、釋放，伊ê店「瑞昌成號」猶閣不時予日本政府「關心」。
日本政府特許，經營樟腦、鹽專賣、航運、糖業
一直到1898年第四任台灣總督兒玉源太郎上任了後，改變殖民政策，利用台灣人士協助管理台灣人。因為辜顯榮bat tshuā日本軍入台北城，koh 討伐匪賊有功，任命伊做台灣總督府事務顧問。行政長官後藤新平發樟腦製作ê許可證hōo辜顯榮，伊就成立「大和行」獨資經營樟腦生理，Koh買一隻「大義丸」ê客貨兩用ê蒸汽船，uì 艋舺到鹿港，沿路停靠逐ê港跤，趁真濟錢。1899年後藤新平koh授權伊全台灣鹽ê專賣權，就此奠定辜--家ê經濟基礎。紲落來幾冬，伊陸續發展足濟種無仝ê產業，有土地開墾、糖業、林業、水產，koh有薰草、鴉片ê專賣，mā有投資台灣銀行、彰化銀行，koh有1寡製造業，有製鐵、製造木材、加工王梨罐頭等等，產業愈做愈大，其中製鹽、製糖、土地開墾是初期辜--家上重要ê事業。
日露戰爭協助日本軍事行動，獲更高榮譽 與支持漢學kah孔廟相矛盾
1904年日露戰爭ê時，日本海軍恐驚露西亞ê艦隊會uì台灣海峽ê南爿包抄--kuè-lâi，就命令辜顯榮率領12隻帆船，tī 鵝鑾鼻附近巡邏、警戒kah通報。辜顯榮著按呢閣替日本帝國大大立功，戰贏了後， 得著閣較懸1級ê「雙光旭章」佮閣較濟經濟利益。辜顯榮予台灣社會有台奸ê印象，除了引𤆬日本政府佔領台灣以外，反對台灣文化協會去支持議會設立運動，mā是另外一ê原因。M̄-koh，辜顯榮hām台灣文化協會ê總理林獻堂關係tsiânn深，除了捐款支持台灣文化協會，1915年ê時辜顯榮mā有kah霧峰林--家合作，創立予台灣人子弟讀ê台中一中。1923年，文化協會為著beh提升台灣人ê政治地位，推捒「台灣議會設立請願運動」，辜顯榮suah 成立「台灣公益會」來反制林獻堂ê議會運動，辜顯榮講，台灣kah中國比--khí-lâi 已經好真濟--ah，經過日本二十八年來ê整理是tsiânn好徛起ê所在，咱ài感謝日本政府才著，伊koh講，林獻堂ê議會運動，並毋是大部份台灣人ê意向。日本檢查官三好一八kā辜顯榮贊聲講林獻堂無資格要求自治，koh o-ló 辜顯榮是台灣ê「顏智」（甘地），m̄-koh這種言論予台灣人真譬相，台灣詩人謝星樓khau-sé講伊是「辜仔榮比顏智，番薯簽比魚翅，破尿壺比玉器」。
政治上、文化上辜顯榮會使講是保守派ê人，毋過伊mā毋是逐項攏順日本人ê意來做。譬論講，日本政府想beh禁止台灣ê漢學堂，辜顯榮就有反對，另外日本政府對台灣ê孔子公廟mā無友善，用都市計畫ê名義kā台北大龍峒ê孔子公廟拆除，落尾手是辜顯榮出資來重起--ê，閣有，日本政府推行皇民化改名運動，辜--家mā無任何1人配合來改名。
閩變 兩岸間周旋
辜顯榮毋但熟似真濟日本官員，mā一直佮1寡「唐山人」有來往。1933年反對蔣介石ê將軍陳銘樞（Tân Bîng-tshu）kah李濟琛（Lí Tsè-thim）等tī福州成立「中華共和國」，歷史學家kā這个事件叫做「閩變」。日本政府趁機會用保護僑民ê名義，派軍艦（kun-lām）去到福建；實際上是欲tshuē機會提著福建ê殖民權，閣準備出300萬箍援助「中華共和國」。這時，蔣介石派行政院前任ê祕書長李擇一去臺灣kah辜顯榮見面，請辜顯榮出面勸日本政府mài支持「閩變」。果然，台灣軍區司令松井石根聽辜顯榮ê建議，kā軍艦撤出福建，松井koh kā「中華共和國」ê佈兵圖透過辜顯榮交hōo蔣介石，平定事件。辜顯榮是閩變事件ê大功勞者，伊ê後生辜振甫加入國民黨了後，有時仔會kā這項代誌，展hōo國民黨知。
晚年 日華戰爭開始
1937年日華戰爭開始，辜顯榮強調「日華親善」ê必要性，伊帶病去中國拜訪張嘯林、杜月笙、陳儀、汪精衛、張群等人，日本陸軍步兵士官學校出身ê蔣介石mā答應欲鬥陣來平息戰爭。這擺ê中國之行，旅途勞頓，用盡心力，轉到台灣ê時狹心症（e̍h-sim-tsìng）koh再發作。晚年ê辜顯榮猶koh用帶病之身，替日本走傱( tsáu-tsông)，關心日本ê安危，盡忠報國。七--月盧溝橋（Lôo-koo-kiô）事件發生，辜顯榮無法度，倒tī厝--裡，目睭金金看局勢ê變化，tō坐船去東京參加貴族院ê臨時會議，狹心症koh再發作，tī眠床頂伊猶是teh責備蔣介石無信用，答應ê代誌無照品照行，害著戰爭發生。12月初9辜顯榮tī日本過身--去，享年71歲。伊對日本ê戇忠，日本人是非常佩服，講辜顯榮是比日本人koh-khah日本ê台灣人。
遺言
毋過，辜顯榮佇伊過身ê時，bat對伊ê後生講：古早人講有讀冊才有才調，無讀冊就無才調，我留財產予--恁，毋是因為我有才調，是因為我有為台灣人做一寡代誌，台灣人才會kā錢寄佇我遮，以後恁有機會，愛想辦法kā錢還予台灣人。
辜--家ê故事，並無因為辜顯榮過身就結束，伊其中ê 2 ê後生，辜振甫kap辜寬敏，in 兩人選擇完全無仝款政治意識ê人生道路，予辜--家會當展開第二幕koh較精彩ê故事。
戰後辜振甫的選擇
1945年8月15，日本戰敗正式投降。大兄辜振甫kap許丙、林熊祥hām日本軍人共議台灣獨立，tī行動中hōo台灣總督安藤利吉阻止，留落來辜振甫「八一五獨立運動」ê汙名，hőng判1年7個月，軟禁tī廟寺內。出禁了後，辜振甫四界去市面收買「辜顯榮傳記」，伊kā買來ê冊lóng燒燒--掉，避免hőng叫做「漢奸後代」ê惡名。
辜振甫生做緣投，身材koh kuân，台北帝國大學畢業，伊講ê日本話tō親像日本貴族ê腔口，典雅優美。伊連鞭加入去中國國民黨，開始學唱京劇，學搬諸葛亮ê角色。小弟辜寬敏kā伊thuh臭講，大兄毋是真正kah-ì唱京劇，伊只是teh做hōo外省人看--ê，是為著欲踏入去統治ê階層，不得不然。
建立水泥kah金融帝國，主導海基會hām中國交涉
1949年10--月伊hām中國ê大思想家嚴復ê外孫女嚴倬雲（Giâm Tok-hûn）小姐結婚。嚴小姐ê小妹tō是大作家華嚴，華嚴ê先生是新聞界ê名流葉明勳，伊hām辜振甫成做大細siān--ê；葉明勳是中央社台北分社ê首任主任，伊hām司法部長黃少谷私交tsiânn好，in tī中國大陸是新聞界ê同事。黃少谷tī日華戰爭ê期間，定定向蔣介石做新聞報告，身份重要。辜振甫為著欲開拓政商關係，出資成立「台灣經濟研究所」聘請黃少谷為董事長。1953年耕者有其田ê政策公佈實行，地主kan-na會使有3甲水田niā-niā，tshun ê農地由政府徵收，地主會當換著公營事業ê股票。辜振甫uì老爸承接ê台中墾地6000甲kah鹽田350甲就按呢交hōo政府，換著台灣水泥公司大量ê股票，伊koh四界去用上俗ê價數收買地主無欲tī ê台灣水泥公司股票，成做台灣水泥公司ê董事長。
水泥是真好趁ê生理，伊tī臺北市中山北路二段起一間六層ê新大樓，上頂層--ê tō-sī做為政商名流ê交際場所，mā有做京劇ê演出。1961年由黃少谷推薦伊出任工商協進會ê理事長。1971年成立中國信託ê銀行業務，大大增加辜--家ê經濟實力，建立著中國信託、中國合成橡膠、日月潭大飯店、中國人壽等企業。後生辜成允mā tshuā集團去中國投資。辜--家tī中國國民黨ê時代，koh再成做全台上好額ê家族。
1990年李登輝總統成立kah中國對口ê單位「海峽交流基金會」，簡稱海基會，辜振甫擔任董事長，彼時伊是國民黨中常委八大老之一。1992年海基會派代表許惠佑去香港hām中國對口單位「海峽兩岸關係協會」簡稱海協會對談。對談中，中國堅持「一个中國ê原則」，台灣海基會主張「一个國家，各自表述」，雙方表達lóng茫茫渺渺；無共識ê「九二共識」就是uì這擺ê會談生--tshut-lâi--ê。
1993年四--月，辜振甫代表海基會去新加坡參加「辜汪會談」，這ê「汪」是代表中國海協會ê汪道涵，這是兩岸50年以來第一擺ê正式會談，引起世界ê注目。陳水扁立法委員批評辜振甫無替台灣人爭取利益，一昧（muī）傾向中國，是台灣人ê漢奸。1998年十--月兩人koh tī上海進行第二擺「辜汪會談」。這兩pái會談lóng無政治談判，m̄-koh大眾lóng kā會談看做兩岸統一ê第一步。
辜寬敏kah台獨運動
辜振甫為著保存辜--家ê發展，1生攏kap國民黨政權關係tsiânn bā，毋過另外1-ê小弟，辜寬敏，tō有真無仝款ê想法佮選擇。
辜寬敏是辜顯榮第四个太太「東京太」岩瀨芳子ê後生，讀台灣大學政治系ê時，和查某朋友蔡國儀去日本結婚，無完成學業。Tī日本讀著王育德教授ê「台灣青年」深深為其中ê義理感動--著，自按呢加入台灣青年會，伊koh成立台灣青年獨立聯盟，自任委員長，hōo中國國民黨政府通緝，是烏名單人士。Tī台灣獨立派中，伊是主張「民族自決」--ê。老爸辜顯榮tī東京留一塊狗屎地仔hōo伊，殊不知，日本政府以市價kā土地收買，做為工業區，一夜之間，伊得著大筆ê財富。伊提一億美金成立「新台灣和平基金會」，內面設有文化、教育、社會等部門，從事公益活動，完成老爸交代「kā錢還hōo台灣人」ê遺言。伊是民主進步黨ê資深黨員，mā-sī台灣獨立運動ê領袖。
兄弟對比kah歷史評價
2004年辜振甫破病tuà tī振興病院洗腰子kah做呼吸治療ê時，tī伊過身進前，小弟辜寬敏有去病院kā伊看，辜振甫雄雄問起：「寬敏--á！有一句話一直想欲kā你講，『你ê選擇是無毋著--ê』。Ah我--neh！幾十年來lóng是一个國民黨ê忠貞黨員，到落尾mā定tio̍h愛用國民黨ê忠貞黨員ê身份，來完成我ê人生，你想按呢敢著？」辜寬敏回答講：「真好！這tō-sī死亡ê美學！」講suah，辜振甫含笑面對小弟，心中就無留牽掛（khian-kuà）--ah！
辜--家ê兩代爸仔囝，對台灣ê歷史lóng影響真大。辜顯榮kah辜振甫lóng是倚靠當權政府，雖然得著無數ê財富，m̄-koh in一世人 hōo台灣人叫做漢奸。小弟辜寬敏堅持理想，用浪漫ê人生觀為台灣獨立奮鬥。你若是in，你beh選擇做tó一ê人--leh？
Comments