061-辜顏碧霞-台灣第一貴夫人ê 堅強人生

經歷sī第一貴夫人、𤆬三个幼囝ê寡婦、扞公司ê第一女社長，白色恐怖時代hőng掠去關，食老熱心公益。雖然是豪門出身，毋閣真正是有愛心、有溫度ê人。 

文稿編寫：郭孟樺 校對：洪偉婷、郭怡婷

出身書香世家 顏碧霞是1914年出世佇台北縣ê三角湧（tō sī這馬ê三峽），老爸顏朝斌是一位老師，bat做過三峽成福區ê區長，是一个書香門第ê家庭。

嫁入豪門成作台灣第一貴夫人

伊tī台北第三高女接受新式ê教育，畢業了後嫁去鹿港ê辜--家。辜家ê大家長辜顯榮領養三个契囝，第四个後生辜岳甫才是辜顯榮親生--ê；顏碧霞小姐tō sī嫁hōo辜岳甫成做辜--家ê大新婦，是「台灣第一貴夫人」。

伊ê tuā-kuann(大官, father in law)辜顯榮是按怎遐爾好額--leh？故事tō愛講轉去到1895年日本軍登陸了後，佇基隆整準軍馬ê時，台灣民主國ê大總統，提著民眾捐--出-來欲買武器ê黃金，裝扮做老阿婆仔「阿婆仔làng-káng」--ê坐船suan轉去廈門；留落來ê廣東兵仔無通食、無通用，四界佇台北城搶劫，造成天下大亂。這時辜顯榮志願去tshuā ā hōo台灣人認為若青面撩牙ê日本人入城，平定亂局有功，日本政府賞賜hōo伊有樟腦ê經營權、鴉片ê經銷權、kah全w台灣鹽ê專賣權，tō按呢辜顯榮成做台灣上好額ê人。

文學沙龍 ê 女主人

翁婿辜岳甫熱愛文學，定定會招待文友來厝--裡。每一擺「文學沙龍」ê聚會，辜顏碧霞lóng會鬥陣招待賓客，hām in討論文學、哲學、政治等ê話題；碧霞佇翁婿ê影響之下，mā開始綿爛（mî-nuā）學習台灣文學，佇「文化沙龍」活動中增加文化ê素養kah視野。「沙龍」是16世紀佇義大利受過教育ê貴婦聚集ê活動。這種活動時行到法國，佇17、18世紀演變成做文學家、哲學家、思想家聚會ê所在，「沙龍」也是歐洲文化啟萌思潮ê據點。辜顏碧霞經過台北三高女近代化教育ê洗禮，koh tuì「文化沙龍」自我學習，除了有科學ê常識，mā ū音樂kah美術ê素養。伊是以「新女性」ê扮勢khiā佇台灣文藝ê舞台。

堅持母愛的寡婦

碧霞婚後生活家庭和樂，hām翁婿育有一男兩女。辜岳甫有人文ê氣質、溫文高雅；m̄-koh好景不常在，伊佇25歲ê時suah過身--去；隔轉年，大官辜顯榮mā病死佇日本，辜--家馬上面臨分財產ê問題；辜--家ê親同仔lóng認為23歲ê碧霞一定會koh再出嫁，家族會議中決議欲kā碧霞ê三个幼囡仔分hōo親人認養。碧霞聽著消息以後，趕緊去跪teh翁婿ê靈前，咒誓終身不再出嫁，用按呢來換著3个幼囝ê撫養權。

台灣第一ê女社長

分家了後，伊分著高砂鐵工所kah東勢糖廠ê財產，為著欲就近照顧事業，碧霞kah囡仔搬去台北太平町ê大橋頭。伊是台灣社會第一个女性ê社長，除了趁錢以外，伊mā繼續翁婿「文化沙龍」ê志業，提供上好ê食物，高雅ê場所hōo文人往來。「文化沙龍」便若作家出版刊物、小說、劇團演出ê時lóng會伸出援手，大力支持；伊mā秉持後頭厝樂善好施ê特質，大方資助困頓ê文人，向望有一工知識份子會當扭轉台灣腐敗ê傳統文化。 碧霞m̄-nā是企業界ê女強人，猶會寫一手ê好文章，伊舉止端莊，有大戶人家ê風範。伊體認家己是少年ê寡婦，平常lóng sī kā面腔武裝--起--來，對家己ê舉止行動特別注意，伊從來毋bat hām單身男性會面--過，避免ē hőng講閒仔話。 小說《流》批判形式主義 寫豪門鬥爭

會曉寫文章ê辜顏碧霞佇1942年出版一本日文ê中篇小說《流》，小說中批判佇大家族內底你爭我奪ê行為，小說中也寫tio̍h民眾佇婚喪喜慶流於形式，對tshia-hua拚場ê形式主義表達不滿；喪禮中親屬無法度安靜懷念亡者，婚禮中新人無閒為著遵守風俗習慣，失去表達親密關係ê機會。故事描述女主角嫁到望族家庭，翁婿死後留落來ê寡女孤母為著財產ê繼承，各方人馬用盡心機，hōo女主角凊心領受著人情冷淡。因為作品內容牽涉大家族內部親情ê鬥爭引起辜--家ê反感，辜--家派人四界到市場買回已經發行佇市面ê冊，kā冊bo̍k收--起-來、燒燒hìnn-hait-ka̍k。

被牽連入獄 ê 文藝女社長

佇日本留學ê作家呂赫若轉到台灣了後，定定去參加辜顏碧霞ê「文藝沙龍」，伊有音樂ê才華，hōo辜顏碧霞tshiánn做查某囝ê鋼琴老師。後--來呂赫若佇伊ê印刷廠印製中國共產黨ê刊物，hōo中國國民黨列為通緝犯。呂赫若向不知情ê碧霞借tio̍h 2500箍，騙伊講是欲去日本ê旅費。這項「資助共匪」ê行為被中國國民黨查--著，碧霞被判12年ê徒刑，所有ê財產lóng被充公--去，經過辜--家ê金錢救援，才kā刑期改為五年。這五年tō-sī關佇高砂鐵工所，這馬已經改為國防部保密局ê「北所」，伊關佇家己ê高砂鐵工所內面，17歲ê後生逐禮拜三tshuā兩个小妹去看老母，hōo辜顏碧霞有活--落-去ê力量；三个囡仔ê生活照顧lóng sī由三峽ê後頭厝替碧霞撫養--ê。

獄中文學對談

伊佇監獄中ê生活艱難，苦悶之下只好寄情於文學。因為無冊通讀，hâm獄友文學對談只好是用會記--得ê內容提出來討論；印象中有《茶花女》、《孤星淚》等，in回想冊--裡ê情節，逐家lóng真同情賣番仔火查某囝ê處境。碧霞雖然是嫁入豪門，m̄-koh伊真關心弱勢ê人士，是一个有愛心、有溫度ê人。

出獄了後熱心公益

出獄了後伊用寫日紀ê方式，來tháu放伊ut-tsut ê心情：伊kā這種悲情ê歲月記持，寫出來講hōo家己聽，過一段時間後tō kā日記燒燒掉，無欲留hōo囡孫仔看。食老ê碧霞一心向佛，熱心公益，hām台北三高女ê同窗組成「尚友會」，去山區照顧原住民兒童，hōo原住民尊稱是「天使ê阿媽」。

平反與重生

1999年，辜顏碧霞依〈戒嚴時期不當判亂kah匪諜審判案補償條例〉提出申請，得著政府ê平反。佇白色恐怖ê時代，中國國民黨為著控制人民，用上極端ê辦法，造成冤獄致使無數人民受害；咱這馬已經是民主化ê時代，會使向政府提出批判，這是佇辜顏碧霞ê時代，按怎tō想袂到ê代誌。伊ê中篇小說《流》ê中文版mā佇這年重新出版。隔當年，伊告別悲歡離合ê人生，離開世間到天國tshuē伊一生唯一ê至愛辜岳甫先生。

1930年代是台灣文藝上ka-ia̍h ê時代，辜顏碧霞用堅定不移ê精神佇文藝界吐出芳味，伊tō親像盛開ê花蕊，kah小說《流》仝款川流不息--ê留佇人間。 辜顏碧霞ê人生，是台灣近代史ê縮影。佇殖民、戰亂、白色恐怖ê時代，伊經歷上濟ê無情，但猶是守著母親ê愛、文學ê志氣。伊ê平反，不單是為伊家己伸冤，閣是hōo歷史記得一位女性ê勇氣。 辜顯榮、辜振甫、辜寬敏父子的故事，請聽李講古我來聽來講「辜--家爸仔囝」