052 台日關係ê開拓者：羅福全

tailoclassatl
Jun 9
6 min read

Updated: Jul 6

文稿編寫：洪偉婷校對：郭孟樺、劉嘉佳

羅福全是1935年出世tī嘉義ê客人家庭，阿叔羅程是地方ê好額人，因為到45歲--ah猶是無後嗣，福全ê老爸tō安排伊hām大姊分hōo阿叔做契囝；隔轉年阿叔生一粒疔仔（ting-á）發癀（hông），46歲ê時suah過身--去。契母認為囡仔愛去日本讀冊才有出脫，tō tshuā 五歲ê福全kah大姊去日本讀幼稚園。書法是羅--家ê傳統，自細漢tō有基礎ê福全，參加東京公學校ê書法比賽the̍h tio̍h第二名，比賽ê題目是「道路若無清氣是國家ê恥辱」，當時日本雖然是戰敗國，m̄-koh袂使hōo外國人看無目地，愛認真維護日本ê國格；日本人ê這款堅持國家名聲ê行為hōo伊印象誠深。二戰後tī日本ê台灣人成做戰勝國ê人民，有坐車免錢、食物配給ê福利，m̄-koh契母看日本真蕭條，tō tshuā福全kah大姊轉到台灣。

福全tńg到嘉義垂楊國小讀4年ê時，完全bē曉用台灣話hām同窗交陪，tī伊五年ê時台灣發生228事件，看tio̍h民兵hōo外省人lia̍h去關，大姊kah嘉義女中ê同窗捏飯丸去hōo民兵食，代誌是愈武愈大、人民不安。後--來地方人士欲平息紛爭，去tsham國民黨講和，結果參議員畫家陳澄波、醫師潘木枝等等hőng銃(tshìng)殺tī火車頭前ê噴水池邊，曝屍一工了後，到半暝仔才有親人敢去收屍。

羅福全高中考入去南部上好ê學校「台南一中」，大學讀ê是台大經濟系。1960年一陣43个uì嘉義中學、台南一中出身ê少年家，依歡送同窗蔡同榮出國為理由，tī台南關仔嶺洗溫泉、聚會結拜聯誼，hōo jiàu-pê-á報去中國國民黨政府，講in違反當時戒嚴時期袂當超過3个人聚會ê法律，結果有人hőng lia̍h去關5個月，上久--ê甚至hőng關到十年。這件「關仔嶺事件」引起南部ê少年非常ê不滿，造成出國ê少年家行入去參加台灣獨立運動ê路。

羅福全退伍後聽老師張漢裕教授ê建議去日本讀經濟，伊去早稻田大學讀碩士，台大歷史系畢業ê未婚妻毛清芬，mā鬥陣去早稻田讀歷史；有一擺tú-hó丈人來東京出差，聽tio̍h in想欲koh去美國讀冊，丈人替in主持婚禮。1964年費城ê台獨聯盟去華府示威，抗議蔣介石政權破壞台灣ê民主制度，兩翁某自踏出第一步了後，tō以台灣獨立運動為志業，開展40年來台灣獨立運動ê人生。

1963年羅福全tī長春藤名校賓州大學讀博士，伊sui hōo費城同鄉會選為會長。當年「關仔嶺事件」ê結拜兄弟張燦鍙、蔡同榮、陳榮成tī美國lóng有連絡--tio̍h，in互相約束逐個月提50箍美金幫贊tī日本ê台獨運動。伊mā長期擔任「全美台灣獨立聯盟」ê中央委員，台灣公論報創刊ê發行人，所有台獨ê活動伊從來毋捌欠席過。1970年ê時有真濟台灣學生開始熱心「保釣運動」，學生陷入去選擇「中華民國」iah-sī「中華人民共和國」ê難題？羅福全以台獨人士ê身分，四界去學校演講，鼓勵台灣留學生做第三選擇tō sī台灣獨立，伊講美國uì英國獨立出來，tō親像台灣uì國民黨政府獨立出來仝款；不過伊ê言論hōo國民黨政府以「叛亂罪」判伊10年有期徒刑，而且名下ê財產mā hőng凍結--去。

羅福全真早tō開始研究世界ê環保問題，他發表真濟論文，其中ê兩篇是有關「空氣污染」kah「區域經濟發展」，hōo聯合國tī日本名古屋ê「聯合國地域開發中心」注目--tio̍h，聘請伊去日本名古屋任職服務；hit-tsūn伊ê護照已經hōo國民黨政府註銷--去--ah，聯合國利用關係替伊申請美國護照，了後koh再申請一本聯合國ê無國籍護照，伊tī一個月內破紀錄--ê提著兩本護照，伊利用聯合國ê護照去50幾个國家幫贊in ê經濟。1980年聯合國派伊去北京，suah hōo國民黨政府指控為「投匪」罪加一等--ê。去上海ê時hōo官員誤認伊是聯合國大官，安排伊tuà tī Nixson總統tuà過ê總統套房，實在有夠好空--ê。伊最後一擺使用聯合國護照是1998年去西藏訪問，參觀達賴喇嘛tī布達拉宮ê辦公室。羅福全tī聯合國服務ê時出過十外本冊，其中「探討經濟發展」kah「都市分佈ê關係」兩本冊hōo哈佛大學、M.I.T.大學kah 140外間大學選為大學用冊，1980年羅福全ê名字列入「世界名人錄」內。伊tī聯合國上班8年ê期間，逐個月攏捐款500箍美金hōo台獨聯盟。

1981年伊為tio̍h兩个囡仔ê教育關係辭去聯合國ê頭路，轉到紐約協辦台獨聯盟ê機關報「台灣公論報」，伊做kah無暝無日--ê，三年中間lóng無領薪水，身軀邊ê存款用kah tshun無半仙，連囡仔欲讀大學ê註冊錢tō無。佳哉蔡同榮夫人提4000箍ê私奇替in兩ê囡仔註冊。1984年國民黨ê僑選立法委員高資敏成立「台灣同鄉聯誼會」，想欲擾亂「台灣同鄉會」ê正牌地位；台灣公論報刊出一篇文章「一个會曉講台灣話ê四腳仔台灣人」」，譬相高資敏是精牲（tsing-senn），高資敏袂堪得受著侮辱，向美國聯邦法庭提出起訴《台灣公論報》，要求賠償415萬美金欲hōo台灣公論報倒店、破產--去，佳哉蔡同榮請人權律師前任ê美國司法部長Ramsey Clark免費--ê替台灣人拍贏官司。

1984年羅福全因為經濟ê原因離開公論報，閣再去聯合國上班。伊tī馬來西亞辦四場亞太經濟會議，後--來tī日本、泰國、印度ê會議了後lóng ē出版一本會議專題演講ê冊。1990年伊hōo東京聯合國大學聘任做審議官，後--來做到高等研究所副所長一直到退休為止。十年ê期間伊每個月捐1000箍美金hōo台獨聯盟。

2000年陳水扁總統想欲派羅福全出任駐日代表，陳水扁知影羅福全tī日本tuà超過25冬，有累積真tsē人脈關係。事實上，人脈關係是做外交上重要ê資產，人面lú闊外交工作tō lú好做；日本人尤其對學歷、地位、身分背景非常ê敏感。羅福全ê學歷、經歷lóng sī一流--ê，上適合做駐日大使，可見陳水扁想欲突破日本ê外交空間，派伊去日本做大使ê是上tio̍h--ê。

第二次世界大戰結束ê時蔣介石放棄對日本ê賠償，tse hōo日本人心存感恩，對台灣派來ê外交人員lóng特別看待。猶毋閣過去50年來，日本已經慣勢hām國民黨往來，對第一位非國民黨ê台灣大使有所憢疑（giau-gi）kah不安，日本ê參眾兩院有250位議員是支持台灣-ê，tī台灣hām日本無外交關係ê狀況之下，tsia--ê議員組織一个「日華議員懇談會」，tse變成做駐日大使上重要ê對口。羅福全第一ê愛去拜會tō sī懇談會ê會長山中貞則，兩人第一改見面時，山中貞則ê 態度無蓋好，第一句tō問，你是啥人派來--ê，是李登輝iah-sī陳水扁--neh？經過羅福全用輾轉（liàn-tńg ）ê日語kā伊說明，講李登輝hām陳水扁仝款lóng sī主張自由、民主、人權ê台灣總統。羅福全hām李登輝相像（sio-siâng）lóng 受過日本教育，iā ū tuà過日本ê生活經驗，會當kah日本民間人士用日語交流。事實上，山中貞則bat tī台北第二師範讀過冊，mā bat tī屏東里港國小教過冊，兩人iā ū共同ê朋友，真緊--ê羅福全tō hōo山中會長接受。每一擺懇談會ê座談會iā sī聯誼會，山中會長會叫羅福全坐tī伊ê身軀邊，刻意beh提kuân羅福全ê地位，hōo坐tī下跤、重視輩分ê議員對羅大使另眼相待。四年ê任期承蒙山中會長替伊開路，hōo伊順序--ê行入去政界推捒台日外交。自從明治維新以來，手giâ枴仔是紳士ê象徵，尤其天皇恩賜ê枴仔是議員上期待ê禮物；可惜--ê是這个傳統suah變無去--ah，山中貞則ê心內有淡薄仔失望，羅大使知影了後特別去新光三越訂製一支銀ê枴仔送hōo山中會長，伊非常ê佮意，晚年lóng sī giâ這支枴仔出門，後--來山中會長過身--去，山中厝--裡ê人koh再kā這支銀枴仔送轉去hōo羅福全，來呈現出in兩長存ê友誼。

李登輝總統落任以後足想欲去日本，一來是去日本治病，二來是去推捒台日ê外交，tse當然會引起中國ê袂爽，一再ê阻擋。羅福全tō定期hām報社主筆食飯，揣機會kah in跋感情，後來日本ê六大報紙lóng支持李登輝ê來訪，透過社會輿論ê力量，順利推捒這段訪問。

2004年陳水扁連任，羅福全hőng調做亞東關係協會ê會長，這个會是台灣政府對日本溝通ê窗口。離開台灣34年ê烏名單人士，總算ē-tàng koh踏入心愛ê故鄉台灣，繼續推捒台日兩國ê外交。