053 李喬

文稿編寫：許毅全 校對：陳翔容、盧彥廷、林琪蓁

眼睛讀台語有點吃力? 用耳朵聽台語 小說家李喬的故事

李喬本名李能棋，1934年出生tī苗栗大湖番仔林ê內山。

老爸抗爭人生，老母堅強扞家(huānn-ke)

老爸李本芳是日本時代農民組合大湖地區ê頭人，定定tshuā人去hām日本人抗爭。伊生性熱情koh有正義感，不管時tī外口為農民ê利益走傱，lóng無時間顧厝--裡ê人；後--來hōo日本政府限制居留tī番仔林，袂使踏出外口一步。家庭ê擔頭lóng落tī消瘦（siau-sán）kah細粒子老母ê身軀頂，老母以做田耕作（king-tsoh） 來維持厝--裡ê食穿，盡心愛護體弱多病乳名叫做「阿泉水」ê李喬，強烈ê求生意志ê老母不時tō叫伊「阿泉水！阿泉水」ê聲音，表達出老母ê堅強、慈悲hām溫暖，也是阿泉水創作文字上重要ê水泉。李喬自細漢tō定定破病，養成伊敏感ê情緒kah矛盾ê性格。

二次大戰以後，老爸代表國民政府接受大湖地區ê產業，奢颺無半年，tī 二二八事件中無端予國民黨政府lia̍h去關，bat hām作家楊逵鬥陣關--過；本成是意氣風發有正義感ê壯年人，經過災難ê拖磨後，規頭變成白毛。每日以酒度日，落坐一生。

師範學校ê啟蒙：哲學、詩詞影響內心世界 李喬初中時去讀大湖職業學校娘仔絲科，每二個月愛去實習飼娘仔，二個月後轉到學校讀冊ê建教合作教育。伊數學、英文ê成績無外好，kan-na考牢新竹師範學校。師範學校ê老師真tsē是uì中國撤退來台灣ê教授，in暫時 tī師範學校教冊，聽候機會欲去大學教冊。內面有一位歷史課ê浙江（tsiat-kang）佛教徒老師，真愛哲學，引tshuā李喬去圖書館看西方哲學kah佛學思想ê冊。三年ê師範生涯，圖書館所有ê社會科學ê冊，lóng hōo伊讀完--ah。 Tse 奠定伊運用意識流kah內心獨白ê寫作技巧。另外一位是國文老師周紹賢，伊專攻近體詩，特別收李喬為入室子弟，要求李喬強背中國詩詞ê音韻，伊koh練習創作200外首ê中國古體詩詞；m̄-koh自從看著賴和ê《一桿秤仔（tshìn-á）》ê現代詩了後，tō kā伊所創作ê古體詩，lóng燒燒hìnn-hiat-ka̍k--去。

教冊七年：決定欲kā家己交hōo台灣文學

師範畢業後，分配到南湖國小教冊，伊每工早起七點到學校，無閒到暗時5點才tńg到厝--裡，拍拚教冊，m̄-koh所趁ê錢無guā-tsē：為著欲脫離kē薪水ê小學教員身份，伊利用暗時讀到三更半瞑，準備七年，才通過普考、高考、高中國文老師檢定考試，成做苗栗高農ê國文老師，伊講tse七年是白白浪費去--ê青春歲月。有tse七年ê人生體驗，hōo伊決定欲kā家己交hōo上合伊性情ê台灣文學。

李喬日--時tī苗栗高農教冊，暗時關tī房間內kā伊細漢ê經驗用筆寫--出-來。有時仔會寫kah精神恍惚（hóng-hut），陷入極端ê自責、自恨、自憐，將滿腹ê悲、苦、酸、疼用筆kā 雕刻出來。22歲ê時，第一篇短篇小說《酒徒ê自述》寫出男主角自細漢tī爸母袂合ê環境中大漢；結婚後koh經濟困難、失業ê驚惶，對未來充滿無安定感，變成做酒鬼ê心路歷程（li̍k-thîng）。

短篇小說創作ê爆發期

李喬tī 30 歲到37歲ê期間，除了認真生活以外，以驚人ê創作力，創作出100外篇ê短篇小說，作品中充滿著怨恨、絕望，李喬想欲釋放出伊uì童年到中年ê孤單，釋放出強欲承擔袂牢ê生命（sing-bīng）能量。

伊ê囡仔講：「阮罕得幾時會當看著老爸ê面，lóng sī看著伊tī-leh房間寫文章ê尻脊骿（kha-tsiah-phiann）」。

大量閱讀哲學、人類學、自然科學、心理學、宗教思想等智識 李喬當時以驚人ê意志力kah求知慾，大量閱讀各種ê冊，包括哲學、人類學、自然科學、心理學、宗教思想等等ê冊。不斷增加ê智識，成做李喬寫作ê養分，hōo伊小說ê用詞閣較感性，閣較有思想ê內涵。小說中特有ê風格，hōo伊成做「文學ê李喬」。

寫《結義西來庵》

44歲ê李喬到成熟穩定ê年齡--ah。伊帶著台灣作家ê使命感，開始由中國文學ê探討，行入去對台灣文化ê認捌；四界去做田野調查後，伊寫出一本《結義西來庵》1915年抗日事件ê長篇小說。

小說是講tī台南有一个hōo日本警界辭頭路ê台灣警察余清芳，伊利用農民ê無知，賣西來庵ê神明符仔騙財，農民相信身軀若tah西來庵ê符仔，會刀槍不入，長命百歲。為著欲hōo農民相信符仔ê威力，余清芳領導ê農民成功--ê突擊（thu̍t-kik）台南市幾落間派出所。後--來日本派出軍隊鎮壓，雙方tī Ta-pa-nî ，tō是這馬ê玉井（Gio̍k-tsénn），發生大衝突，造成台灣人1940人死亡，tse是台灣歷史上抗日事件中，死亡上tsē ê 紀錄，mā-sī台灣人上尾一擺ê抗日事件。作品指出因為農民土地被奪，致使生活困難，不得不做出保衛鄉土ê無奈行動。李喬tō開始用激動ê內心，行入去伊無蓋熟似ê台灣歷史--裡。

代表作《寒夜三部曲》 49歲ê時，tī苗栗高農退休了後，李喬tō有較tsē ê 時間--ah，伊寫出一部將近一百萬字有關台灣農民ê大河小說。《寒夜三部曲》ê女主角燈妹事實上是伊老母ê化身，男主角劉阿漢tō是伊老爸ê寫照，伊kā台灣百年來悲情運命ê歷史寫入去小說內底。

《寒夜》是tī清國末期（bua̍t-kî）對唐山來ê客人家庭到苗栗蕃仔林開墾，kā原住民搶土地。後--來hōo地方惡勢力hām清國官府勾結（kau-kiat），失去土地ê故事。《荒村》是1925年劉阿漢參加農民組合，爭取農民ê權益，mā參台灣文化協會ê有志人士，爭取台灣人政治地位ê故事。《孤燈》是1941年日本發動大東亞共榮圈（tāi-tong-a kiōng-îng-khuân）戰爭，tī一切為戰爭ê需求之下，台灣島內物資欠缺（khiàm-khuat）生活困難。台灣囡仔koh hōo日本調去南洋做軍夫（kun-hu），tī死亡ê行軍中，欲死進前猶閣是面向台灣，向晟養（tshiânn-iúnn）in ê 台灣土地行禮ê悲慘故事。

李喬kā寒夜三部曲提升到有母親意識ê台灣文化，台灣ê土地tō親像咱ê母親仝款。台灣人ê根老早（láu-tsá）tō釘tī母親ê身上（sin-siòng）。寒夜三部曲koh kā土地ê愛，延伸（iân-sin）去到棉棉不斷ê歷史舞台--裡。這phoo大作（tāi-tsok）被翻譯做英文，部份翻譯做日文、西班牙、捷克文（tsia̍p-khik）。

參與社會運動是文學ê實踐 經過歷史文學ê洗禮後，李喬進一步行入去社會運動。1983年陳永興醫師接辦《台灣文藝》，李喬出任做主編。1996年建國黨創黨，李喬當選為決策委員。1997年伊主持大愛電視台《客家週刊》ê客家文化節目，伊kā參與社會運動當做是台灣文學ê實踐。

《埋冤、1947、埋冤》

1990年伊完成《埋冤、1947、埋冤》（tâi-uàn）ê歷史素材ê長篇小說，tī田野調查二二八事件ê時，伊感受著受難家屬ê痛苦，hōo伊ê內心非常激動，寫小說ê時，伊刻意壓制「講古」ê本事，盡量忠於事實。最後，才對社會憤慨提出批判。《結義西來庵》、《寒夜三部曲》、《埋怨、1947、埋怨》這三phoo長篇小說是李喬內心對生命（sing-bīng）ê真情對話，奠定伊tī台灣文學史ê地位。

文學ê舞台，社會ê身影：主持、改編、獎項

58 歲ê李喬口才好，理路清楚。充滿活力主持公共電視台ê《文化過家》koh tī tsiah新開張ê客家電視台主持客家文化節目。作品《寒夜》mā由公共電視台改編為客家連續劇。2006李喬得著文化界上kuân ê榮譽（îng-û），由陳水扁總統頒發《國家文藝獎》。

小說ê批判精神

李喬ê寫實作品充滿伊對社會人文ê關懷，伊長期投入民主運動kah改革，作品中描寫出對社會不公不義ê批判。尤其是短篇小說《告密者》內面講國民黨政府是如何用三萬線民，以監視、抹烏人民ê方式來維持伊ê政權。2019年李喬去《促進轉型正義委員會》調查，發現伊tī 80年代有5个線民長期監視伊14年之久，其中一个甚至是伊上親ê人，監視ê理由是—國家ê敵人。

成立〈山泉文學基地〉並且出版《李喬全集》

自細漢tō hōo老母叫做「阿泉水」ê李喬，tī 2017年成立《山泉（suann-tsuânn ）文學基地》，10外个大學教授內面包括第二个查某囝李舒亭教授在內，in共同tī-leh編輯《李喬全集》。臺灣李喬文學協會會長、中央研究院原分所研究員兼所長陳貴賢博士，希望會當爭取李喬被提名為Lo̍k-puè-ní文學獎ê候選人，hōo世界認bat這位台灣文學ê國寶級作家。

#山泉文學基地 #客家委員會 #李喬全集 #寒夜三部曲