057 鄧雨賢-台灣歌謠之父

tailoclassatl
Jul 4
7 min read

台文編寫：林琪蓁校對：陳翔容、盧彥廷、許毅全

咱第25集紹介過台灣ê Rachmaninoff—蕭泰然。比蕭泰然koh khah早進前，咱台灣tō已經有一位「台灣歌謠之父」—鄧雨賢。伊短短39年ê人生，創作出將近百條流傳到今、上有台灣特色ê歌曲，代表作是「四月望雨」─〈四季紅〉、〈月夜愁〉、〈望春風〉、〈雨夜花〉。台灣ê長榮航空採用其中ê〈望春風〉kah〈雨夜花〉tī 班機落地台灣ê時放送，tī異鄉ê台灣人逐擺聽著，定著深深感動：我已經tńg來到故鄉--ah。 (眼睛讀台語有點吃力? 用耳朵聽台語作曲家鄧雨賢的故事)

真歡喜逐家來收聽李講古，我來聽。這禮拜咱beh來聽一位作曲家，鄧

雨賢（Tīng Ú-hiân）先生ê故事。鄧雨賢上出名ê作品是四月望雨─〈四季紅〉、〈月夜愁〉、〈望春風〉、〈雨夜花〉。

台北師範學校-音樂種子ê發穎

台灣民謠作曲家鄧雨賢是1906年出生tī桃園龍潭八張犁。老爸鄧盛柔（Tīng Sīng-jiû）是出身名門，書香傳家ê客人家庭，伊tī龍元公學校擔任老師，後--來去台北總督府國語學校做漢文先生。鄧雨賢tī 3歲ê時tuè老爸到台北以後，tō tī台語ê環境中大漢。小學是tī艋舺公學校受教育--ê；15歲ê時順利考入去台北師範學校，學校以培養全能教師為目的，非常重視音樂ê養成，每一間教室lóng配有一台風琴，伊tī恩師宮島慎三郎指導之下，學會曉小提琴、鋼琴、曼陀林、吉他等樂器，宮島老師o-ló講伊是天才型ê音樂學生；台北師範學校ê音樂教育，對鄧雨賢日後ê歌曲創作有相當重要ê影響。

人生ê轉捩點-結婚與轉職

畢業了後，伊hőng分發去台北圓環附近ê日新公學校，隔轉年，經過媒人ê紹介，hām台北第三高女畢業ê模範生，iā是竹東ê客家少女鍾有妹結婚。因為鄧雨賢是師範學校正科班畢業--ê，服務兩年tō升做訓導，訓導會使身穿框金巡ê制服，koh身軀phāinn tio̍h長劍，行路有風，伊koh有新時代ê新智識，是人人欣羨tsiânn有派頭ê頭路； 赴日留學：作曲專業ê養成 m̄-koh伊對音樂愈來愈有趣味，tō毅然辭去教職，離開厝--裡ê某囝，單身去到日本東京歌謠學院深造，這間學校是以教歌曲ê創作為主，鄧雨賢tī學校兩年專修作曲學理。因為思念厝--裡ê某囝，提早離開學校，無提著正式ê學位；m̄-koh作曲ê實力增加tsiânn tsē，為日後ê作曲拍落來深厚ê理論基礎。

初出社會：作曲人ê起步

轉到台灣，雖罔有it身ê作曲絕技，m̄-koh台灣ê流行歌時代猶未到，伊只好去台中地方法院做通譯，通好來維持家庭ê經濟。

創作ê黃金歲月-古倫美亞時期 兩年後，伊ê機會來--loh！台語創作ê歌謠〈桃花泣血記〉是台灣第一條電影ê宣傳流行歌，電影公司派樂隊四界沿路演奏，吸引觀眾入場看電影，歌曲mā tuè tio̍h電影ê時行。本成是製作歌仔戲唱盤kah進口日本流行歌曲盤ê古倫美亞公司看著商機，tshiánn 已經tī歌仔戲曲盤界出名ê歌手純純kah樂隊去日本灌錄〈桃花泣血記〉ê流行歌曲盤，結果意外大賣6萬外塊。古倫美亞公司tō信心大起，擴大陣容，聘請已經為文聲唱片寫出流行歌〈大稻埕進行曲〉ê鄧雨賢uî公司ê專業作曲人，公司mā聘請台灣文學界ê才子陳君玉出任文藝部長，部長聘請牧師出身ê姚讚福，負責訓練歌手ê演唱技巧。

社長栢野正次郎一再交代作詞、作曲愛有台灣味，愛創造出台灣歌謠ê價值。

鄧雨賢進入古倫美亞公司馬上受tio̍h重用，每個月70外箍ê月俸，比高級公務員領--ê koh khah tsē，新曲盤發表ê時koh有獎金通領，出門有烏頭仔車代步；伊穿插高雅，身穿名牌tuè tio̍h時行ê服裝，mā留落來真tsē精彩ê相片。社長栢野認為藝術創作愛根據社會ê動態，伊要求作曲人、作詞人愛親身去觀察民眾tī-leh想啥？Tī-leh創啥？Tse對bat tī台中法院做過兩年ê通譯，看盡人生百（pik）態ê鄧雨賢有真有幫贊；當時公司內ê作曲家王雲峰、姚讚福、蘇桐、鄧雨賢等創作ê曲風，lóng sī hām台灣30年代ê社會、民眾ê生活經驗，有息息相關。

公司ê經營政策拄好hām台灣30年代ê新文化運動sio結合。《台灣文藝月刊》ê座談會，bat邀請鄧雨賢以音樂家ê身分參加，伊發言講：「西方文化不斷入侵台灣，造成文學、音樂、藝術界人士過度崇拜西洋文化，按呢會hōo文化hām大眾愈離愈遠。」伊講伊tō是由原有ê歌仔戲、山歌、唸謠、七字背來改編旋律，iā是改編歌詞，伊kā這種經驗提出來hām文化界ê人士分享。

四月望雨ê誕生

進入公司ê第一年tō創作出〈望春風〉、〈月夜愁〉、〈老青春〉等動人（jîn）ê歌曲，真tsē民眾lóng是第一擺聽tio̍h流行歌曲。第二年再推出〈雨夜花〉、〈青春嶺〉、〈春宵吟〉等作品，一（tsi̍t）時間歌曲傳遍台灣各地。鄧雨賢hām公司ê專屬作詞家李臨秋、周添旺、陳君玉kah歌手純純、愛愛合作ê團隊，kā台灣流行歌曲tshuā入去美好境界，hōo 人耳（ní）目一新。伊mā kā田野採集ê民謠、戲曲作為創作ê元素來源，編寫出鋼琴伴奏ê樂譜，親像〈四季紅〉、〈送君曲〉、〈十八姑娘一蕊花〉等名聲透台灣ê歌曲。到這時，伊已經是上受歡迎ê作曲家--ah；上受聽友kah-ì ê 4條歌〈四季紅〉、〈月夜愁〉、〈望春風〉、〈雨夜花〉hōo聽眾合稱為〈四、月、望、雨〉，是台灣民謠ê經典之作。

兼顧教學與家庭的紳士

鄧雨賢ê工課除了作曲以外，mā愛教歌手唱歌，koh愛tshuā歌手kah樂團去日本錄音。歌手心目中ê老師是一ê個性溫和ê紳士；m̄-koh教歌ê時人會變tsiânn威嚴，學生上課ê時lóng會tsiânn緊張，事實上，伊是愛學生ê好老師。老師重視家庭生活，下班後tō隨轉去厝--裡，不三時會tshuā規家伙仔去外口tshit-thô，有一ê美滿ê家庭。雖然名歌星純純對老師ê愛情有所期待，bat主動去追求鄧雨賢老師；m̄-koh老師已經有家庭--ah，tō拒絕純純ê愛意。

音樂ê變調-皇民化時期

1937年日華戰爭爆發，台灣總督府推動皇民化運動，成立「台灣演劇協會」，開始大規模強制實行「新台灣音樂」，規定所有ê曲調lóng愛用日語發聲。當時ê日本軍隊m̄-nā兵源無夠，mā欠缺勞動力。政府不斷鼓勵台灣百姓去做軍伕，軍伕tō是愛去前線ê工地做無錢工ê「勤勞奉仕」，mā積極鼓勵台灣囡仔去做志願兵，為日本所謂「大東亞共（kiōng）榮圈（khuân）」ê偉大使命犧牲性命，軍方利用鄧雨賢上受歡迎ê〈望春風〉改編做日語歌詞，成做〈大地tī-leh召喚〉，〈月夜愁〉改做〈軍伕之妻〉，〈雨夜花〉改做〈名譽ê軍伕〉。原本是憂愁ê慢板旋律，竟然改編做激動ê快板軍隊進行曲。歌曲中強調台灣人出海做軍伕，為國盡忠ê榮譽（ū）感，tī學校kah政府機關ê強力推銷之下，歌曲suah比進前koh khah普遍流傳。

疏開至新竹芎林

台灣流行歌曲tī日本皇民化運動之下，漸漸消沉--落-去。戰爭iā愈來愈激烈，盟軍ê飛行機不時會來空襲；鄧雨賢規家伙仔tō疏開去新竹靠山倚溪ê偏僻所在芎林（Kiong-nâ）鄉，伊hām鍾有妹鬥陣tī芎林公學校教冊，鄧雨賢彼時ê月俸是47箍，鍾有妹ê月俸才23箍niā-niā，兩人合起來ê收入無夠納厝稅，tō tuà tī供奉當地儒生ê文林閣邊ê簡單房間。人生ê巧遇真正奇妙，鄧雨賢ê阿祖鄧兆熊（Tīng Tiāu-hiông）是當時在地ê漢學先生，培養出真tsē 秀才，tō是tī tsia hőng供奉tī文林閣ê正殿--裡。

日夜兼課作育英才

鄧雨賢雖罔經濟有所困難，m̄-koh伊接受運命ê安排，並無失志，伊專心投入教育ê工課，是人人o-ló ê老師；伊m̄-nā教學生樂理、合唱kah音樂欣賞，伊發揮所長，組成竹東交響樂團kah芎林青年合唱團，做伙去四界演出。伊暗時兼任學校ê日語學習班kah基礎教育班ê老師，伊對芎林地區ê教育有真大ê貢獻。

藝術家ê落幕

鄧雨賢ê身體無蓋偌勇健，伊全心投入教育，suah疏忽（soo-hut）健康ê重要。伊koh長期有食薰ê慣勢，加上戰爭期間物資、藥品khah欠缺，伊袂堪得擋到戰爭結束，tō tī日本統治台灣ê最後一年，「春風」猶未「望」tio̍h，tō tī 1944年6月12因為肺炎引起心臟病併發，tī竹東過身--去，享年才39歲，雖罔伊創作ê數量，無法度hām音樂大師比並（phīng），m̄-koh伊短短8年創作期間，留落50外首作品hōo--咱；這（tsit）50幾首作品，經過時間ê淬鍊，早tō已經由流行性歌曲，蛻變做台灣人時代性歌謠，成做每一ê台灣人共同ê記持，鄧雨賢ê名字已經是永遠袂hőng放袂記--得ê歌謠藝術家。

戒嚴時期的禁歌

日本戰敗了後，suah--落-來輪tio̍h中國國民黨來台統治，狗去豬來，台灣進入去戒嚴時代，鄧雨賢ê作品〈雨夜花〉竟然被列為禁歌，〈四季紅〉ê「紅」字因為hām共產黨ê紅軍仝字，被改為〈四季謠〉。1979年黨外ê歌神邱垂亮（Khu Suî-liang）先生，因為美麗島事件向中國國民黨抗議，tī演講台kan-na唱〈雨夜花〉、〈望春風〉、〈補破網〉3條歌niā-niā，tō被關入去烏牢四年半，這是鄧雨賢先輩萬萬想袂到--ê。

名留後世：龍潭湖邊ê銅像+彰化高中「雨賢館」

1984年台灣第一擺有本土音樂家ê紀念銅像，鄧雨賢ê銅像，就tshāi tī伊故鄉龍潭ê湖邊。伊39歲ê短短人生，tō親像紀念碑文所寫--ê「人生有限，藝術永恆」。解嚴後逐家才漸漸仔開始認bat台灣文化hām藝術，1996年彰化高中新成立ê現代化音樂廳落成，舉行票選（phiò-suán）號名活動ê時，由台灣文化研究社提名「雨賢館」，得--著ê票數，比四界ba̍t-ba̍t-sī ê中山堂加足tsē票--ê，雨賢館是全國第一間以台灣人號名ê校園建築。

台灣歌謠ê願景-徛佇世界舞台

鄧雨賢tī台灣音樂史ê地位，tō kah Stephen Foster tī美國音樂史，Johann Strauss tī 奧（ò）地利音樂史ê地位仝款。台灣流行歌是咱近代台灣人所創作出來上寶貴ê文化財產，上有文化特色。

伊來自民間，所以會感動tio̍h濟濟無仝階層、無仝智識ê人民，當當台灣人同齊tī-leh唱鄧雨賢ê 台灣歌謠ê時，會特別感受tio̍h咱tō是台灣人。台灣歌謠雖罔有強烈ê民族性，m̄-koh mā是上會當hōo國際人士接受；tō親像美國 Stephen Foster ê美國民謠〈Oh! Susanna!〉kah 奧地利 Johann Strauss ê〈圓舞曲〉是全球流行ê世界名曲，逐年維也納新年音樂會，tō是以Strauss ê民族歌曲做主題。咱希望台灣歌謠mā仝款會當推捒到世界各地，成做世界名曲。Tō親像1994年4月初10，出名ê溫哥華交響樂團演出蕭泰然改編鄧雨賢ê〈望春風〉ê時，優美ê旋律，確實hōo台跤tsē-tsē 觀眾感動kah流落目屎。