056 李石樵 畫壇ê萬里長跑者
- tailoclassatl
- Jul 3
- 7 min read
台文編寫：郭怡婷 校對：洪偉婷 郭孟樺
hē 生命去追求藝術創作的邊界，一世人綿死綿爛一直畫，感覺家己永遠無夠格；m̄-nā 家己不斷學習，而且閣免費教學生的藝術家，萬米長跑者，畫家中的畫家-李石樵的故事。
眼睛讀台語有點吃力? 用耳朵聽台語畫家李石樵的故事
出身背景與美術啟蒙
李石樵1908年出世tī台北廳貴仔坑（tō sī這馬ê泰山），厝--裡開一間米絞工場。伊天資聰敏，考入去台北師範學校，誠好運--ê受教於知名ê美術老師石川欽一郎，接觸著正規ê美術教育，石川老師是伊一世人ê啟蒙老師，開啟伊永遠不停ê長跑美術人生。
青年初試啼聲，入選台展
19歲ê時，tō以處女作「台北橋」入選第一回ê台展，呈現出伊ê藝術才華。20歲ê時，閣再以油畫「都市ê後巷」入選第二回ê台展，石川老師鼓勵伊繼續去日本深造，學長陳植棋特別去說服李爸爸，hōo李石樵去日本留學。
日本留學ê波折
21歲ê李石樵結婚tshím兩年tō單身去到東京，tī學長陳澄波、陳植棋ê照顧之下，先去為考生設ê畫圖前期班，hām李梅樹兩人做伙合租宿舍。想袂到兩擺入選台展ê李石樵，suah考無牢東京美術學校。隨後，陳澄波安排伊去「川端畫學校」kah「本鄉洋畫研究所」學習畫圖ê技法。伊ê油畫「榕樹跤」入選台灣第3回ê台展。1930年伊去考東京美術學校再度落榜；m̄-koh「編織少女」得著台灣日日新報ê「台日賞」，得獎提tio̍h ê獎金hōo伊會當繼續留tī東京。伊逐工畫圖12點鐘之久，畫kah手lóng結lan--去。佳哉，第三擺ê考試總算是皇天不負苦心人，考入去東京美術學校五年制ê西洋畫科，這間學校是專門teh培養專業畫家ê學府。
帝展ê榮耀
仝年10--月，以第4小弟為moo-teh-luh ê「四弟之像」油畫作品再度入選台展，伊連紲十年ê入選，得著以後免審查入選台展ê資格。經過石川老師ê紹介，tī東京美術學校崗田三郎ê教室學畫，大學三年ê熱--人，tńg去台灣替板橋林本源家族畫130號ê大幅油畫「林本源庭園」，伊以這个作品入選人人欣羨ê帝展。隔轉年，閣再以「畫室內」入選第15屆ê帝展。彼時ê台灣畫家lóng是以參加帝展做為in ê目標，會當入選帝展，kā圖吊tī帝展ê壁頂是全台灣文化界ê光榮，證明台灣人是袂輸日本人--ê。1936年東京僑領楊肇嘉贊助伊1000箍，請伊畫ê「楊肇嘉氏ê家族」入選已經由帝展改名ê「新文展」，這幅圖甚至引起日本天皇ê興趣。 伊連續7擺入選帝展或者是改過名ê新文展，33歲ê李石樵得著以後免審查參加展覽ê資格，伊是第一个得著這款榮譽ê台灣人。
台陽美術協會ê成立與爭議
李石樵hām七个朋友成立ê「台陽美術協會」，是beh kah官方ê府展、台展拚注--ê。李石樵以「倒--ê露體女性」參加第二屆ê台陽展，接受日本警察審查ê時，警察以khiā--ê露體畫才會使，倒--ê露體畫袂使為理由，禁止作品參加展覽；m̄-koh伊另外ê作品「露體婦人」suah tī東京美術館ê展覽中得獎。1938年李石樵tńg到台灣了後tō一直留tī台灣，伊繼續入選著府展、台展、台陽展。
戰爭與社會現實ê描寫
1943年李石樵完成ê作品「合唱」是戰爭時期，美國B29轟炸機飛到台灣，khian炸彈爆擊ê時，李--家ê囡仔bit tī防空壕內，由大兄領導囡仔兄囡仔姊合唱日本軍歌，來安定不安情緒ê畫面。「合唱」是李石樵第一幅展現社會意識ê作品。
二二八事件與藝術創作ê轉變
二二八事件發生ê時，好友陳澄波當時是嘉義市ê參議員， 伊為著欲平息事端，主動去水上機場hām中國國民黨政府協調，不幸--ê suah hőng銃殺tī嘉義火車頭前ê廣場。發生這種ê代誌，hōo伊內心有真大ê衝擊。1945年到1948年之間，伊改變參加帝展ê畫風，創作出反映社會ê寫實主義作品。「市場口」畫出當時台灣物資被逼送去中國支援內戰，致使台灣欠缺糧食，米價一日三市--ê。畫面頭前穿著破衫褲ê販仔tī-leh 散賣一袋珍貴ê白米，有一隻瘦pi-pa ê 烏狗tī塗跤tshuē物件食。畫面中ê人物lóng 無啥表情，全然無「台灣光復」ê歡喜感；畫面ê正中央，行出來一个中國來ê女子，伊身穿白色ê旗袍，掛烏仁ê目鏡，手提高級ê皮包仔，光線拍tī伊ê身上，一看tō-sī一身光彩ê海派人士，hām伊身軀邊為著食穿tī-leh討趁ê人，拄拄好呈現出階級ê差別，瘦pi-pa ê烏狗，象徵hit-sî台灣人ê艱難困境。
重建希望 ê「建設」
仝年ê作品「建設」畫出受著戰爭爆炸破壞去ê情境，人民tī廢墟中khioh猶會當用ê建材，beh重建家己ê家園，作品中有真tsē褪腹裼ê壯丁，逐家lóng無閒tshih-tshih。Khiā佇畫面正爿一个身材結實、擔石仔ê工人，眼神向向(ǹg-hiòng)遠方，大步向前行，毋閣路suah hōo另外一个khà石仔ê工人擋牢著，無路通行，反應出對社會ê無奈。畫面ê頭前有老母tshuā一對囡仔，查某囡仔坐tī石枋頂kuân，雙手輕輕--ê合齊，敢若是tī-leh祈禱ê款勢；查埔囡仔安靜leh看手--裡ê玉蘭花，象徵tī社會動亂，經濟失衡ê時，囡仔期待畫中ê玉蘭花會當tshuē來新ê希望。
成立畫室，培育人才
李石樵tī新生南路二段，買一間kan-na有地上使用權ê日本宿舍，成立李石樵畫室，免費ê教學生畫圖，真tsē學生是uì美術學校koh再來tsia學--ê，34年來伊桃李滿天下，培養出無數ê畫家，伊ê子弟兵是省展ê常勝軍，對畫壇有真大ê影響力。李石樵一生專心追求藝術，m̄願kā人tìm頭，有時陣愛飼雞賣雞卵，iah-sī替人畫像趁錢來補貼生活。沉重ê家庭負擔，hōo伊不得不愛接受省立師範大學美術系副教授ê工課。
社會批判畫作「大將軍」
1964年台灣學者彭明敏教授hām學生謝聰敏，魏廷朝起草「台灣人民自救宣言」hōo中國國民黨政府lia̍h去關。伊偷偷á tī畫室完成「大將軍」，畫中ê大將軍一看tō知影 sī蔣介石。光頭ê獨裁者，帶著奸臣仔笑，規身軀ê軍服掛滿著勳章；背景ê日本軍旗破一空--去，中華民國ê國旗12道光芒霧霧--ê失去光彩。大將軍一蕊目睭蒼白無力，另外一蕊是烏趖趖--ê。作品對時事喙尖舌利ê批判，hōo這个藝術品發出正義ê光芒。「大將軍」藏tī倉庫27年，一直到刑法100條廢除了後，才敢重新提出來發表。
畫醫療奉獻精神 割膚之愛-蘭大衛醫師
1956年，高雄醫學院ê創校校長杜聰明博士，邀請李石樵kā1928年發生tī彰化基督教病院，院長蘭大衛夫人割皮膚hōo燙傷ê台灣病童ê故事，畫成「蘭大衛醫師ê皮膚移植手術」畫作，掛tī高雄醫學院走廊上蓋顯目ê所在，beh hōo 來來往往ê學生，感受醫生對病人ê疼痛；這幅圖現此時是高雄醫學院ê鎮院之寶。
「三美圖」風波與言論自由
1975年，李石樵ê「三美圖」是畫三个露體ê台灣女性，in手牽手--ê khia做伙，純潔ê模樣是李石樵模仿希臘神話「美惠三女神」ê作品。這幅圖hōo華南銀行提去印tī番仔火盒仔送hōo客戶點薰用，m̄-koh hōo 衛道ê民眾檢舉講是色情圖片，教歹囡仔大細。華南銀行只好收回番仔火，停止贈送ê活動，m̄-koh這項代誌mā牽涉到妨害風化ê刑事問題。Tng-teh美國西雅圖探親ê 李石樵專工趕tńg來台灣說明，經過美術界人士ê奧援，講畫露體ê moo-teh-luh是寫實油畫必要ê基本訓練，而且，這種kā自然形象簡化ê露體美女圖，koh 較 hām 色情無關--ê，代誌才平息--去。
移民美國，畫風轉變
李石樵畫室hōo地主周氏祭祀公業收回了後，結束伊34年ê教學生涯，移民去美國西雅圖hām第二查某囝tuà。美國自由ê風氣，清新ê風景，四界lóng有花蕊，伊tō親像達摩祖師面壁修行仝款，每工作畫10點鐘，伊mā開始改變畫風，增加色彩明亮度；伊講畫60年圖，tī美國才tshuē著新ê心得，伊直接kā顏料tī畫布頂調色，產生出一沿ê薄塗，hōo第一沿ê色彩量約仔表現出來，色彩愈薄色調suah愈飽tīnn，這
愛妻來富，一世人伴隨
李石樵一生上重要ê支持者tō sī 夫人周來富，來富自細漢tō來李--家做新婦仔，in兩人19歲ê時hőng送做堆，結婚後兩人ê收入，攏是靠來富kā人洗衫趁錢，來支持翁婿ê藝術生涯--ê。李石樵去日本ê時，厝--裡ê囡仔、大家、大官lóng si由來富照顧--ê，hōo李石樵會當tī日本安心ê學習。來富hām別人ê藝術家夫人無仝，伊無愛賣翁婿ê作品，伊講he是李石樵ê心血，藝術tō sī 伊ê性命。李石樵到80歲ê時才第一擺畫夫人，作品「閒日」當中ê夫人輕鬆--ê半thenn倒tī膨椅頂，不善言語ê藝術家翁婿用作品「閒日」來表達伊對夫人ê感謝kah意愛。
成立美術館，傳世之志
1991年李石樵tī忠孝東路四段ê阿波羅大樓三樓，買一間80坪ê單位，做為李石樵美術館，伊捐出400件ê作品hōo基金會，tī開幕典禮hit工，看著伊難得ê笑容；伊用一生ê心血，欲對社會交代ê作品，終其尾有一个安頓ê所在--ah。學生mā陸續捐款hōo基金會，in閣再買一塊38坪ê地擴充原本ê美術館；第一屆ê李石樵師生美術展tō sī tī tsia舉行--ê。Hām李石樵相隨75年ê師母周來富以83歲ê高壽過身--去。
藝術永留傳 人生臻圓滿
1995年創作藝術65年ê台灣國寶，李石樵老師tī美國紐約過身--去。李登輝總統頒發褒揚令，褒揚伊推捒台灣藝術ê貢獻，並由陳水扁市長陪同參觀李石樵老師ê遺作展。李石樵ê泰山祖厝hōo新北市指定為市定古蹟。
精神與風格成做後代典範
李石樵前輩一生培養無數ê藝術家，提昇咱台灣人ê文化水準，伊是台灣人得獎上濟ê畫家。伊ê作品風格不斷leh變化，uì早期ê寫實主義，日本時代ê意氣飛揚，國民黨時代伊透過畫作反應社會現實，到後--來放棄kā極權者對話，改做抽象變形ê創作風格，晚年移民到美國，又閣回歸到寫生，tī造型簡練中，畫出純然ê豔麗。65年ê藝術生涯，堅定用走馬拉松ê創造精神，走到精彩ê終點站，伊是咱後輩學習ê對象。
EP 55｜李石樵-畫壇ê萬里長跑者 Apple Podcast https://reurl.cc/bYrVxv
Spotify https://reurl.cc/yv8LlD
KKBox https://kkbox.fm/2x1WX9
MixerBox https://reurl.cc/v62nWN
Comments